قازاقستان، تاجىكستان، تۇرىكمەنستان جانە وزبەكستان رەسپۋبليكالارى پرەزيدەنتتەرى قىرعىز رەسپۋبليكاسىنداعى وقيعا تۋرالى بىرلەسكەن مالىمدەمە جاسادى. بۇل تۋرالى اقوردا سايتى حابارلادى.
"باۋىرلاس قىرعىز رەسپۋبليكاسىندا بولىپ جاتقان وقيعالار ءبىزدى قاتتى الاڭداتىپ وتىر.
ءبىز عاسىرلار بويى اجىراماس دوستىق، تاتۋ كورشىلىك بايلانىستارى مىعىم، مادەني جانە رۋحاني قۇندىلىقتارى ورتاق جاقىن كورشى ەلدەر رەتىندە قىرعىزستان حالقىن وسى قيىن كۇندەردە پاراساتتىلىق تانىتۋعا، ەلدەگى بەيبىتشىلىك پەن تۇراقتىلىقتى قايتا قالپىنا كەلتىرۋگە شاقىرامىز.
قىرعىزستاننىڭ بارلىق ساياسي پارتيالارى مەن قوعامدىق ۇيىمدارى بەيبىتشىلىك پەن تىنىشتىقتى قامتاماسىز ەتۋ ءۇشىن قاجەتتى كۇش-جىگەرىن بىرىكتىرىپ، تۋىنداعان ماسەلەلەردى كونستيتۋسيا مەن ۇلتتىق زاڭنامانى ساقتاي وتىرىپ شەشەدى دەپ ۇمىتتەنەمىز.
قىرعىزستانداعى تىنىشتىق – وڭىرلىك قاۋىپسىزدىك پەن ورتالىق ازياداعى ورنىقتى دامۋدىڭ ماڭىزدى فاكتورى.
ەلدەرىمىزدىڭ وتكەن جولى ءبىر جانە بولاشاعى دا ورتاق. ورتالىق ازيا حالىقتارىن كەلەشەك ۇرپاقتىڭ يگىلىگى جولىنداعى بەرىك بەيبىتشىلىككە، كەلىسىم مەن جاسامپازدىققا ۇمتىلىسى بىرىكتىرەدى.
مەملەكەتتەرىمىز ورتاق ماقساتقا بىرىگە وتىرىپ، ساۋدا-ەكونوميكالىق، ينۆەستيسيالىق، كولىك-كوممۋنيكاسيالىق جانە مادەني-گۋمانيتارلىق بايلانىستاردى، شەكارالىق جانە ءوڭىرارالىق ءىس-قيمىلداردى كۇشەيتۋ جونىندەگى ايماقتىق ىنتىماقتاستىقتى بەلسەندى نىعايتۋدا.
ورتالىق ازياداعى ىنتىماقتاستىقتى ودان ءارى جانداندىرۋ ماقساتىندا ءبىز قىرعىزستان حالقىنىڭ بىرلىككە، بەيبىتشىلىككە، دەربەس دامۋعا جانە وركەندەۋگە دەگەن ۇمتىلىسىن ۇنەمى قولدايمىز" دەلىنگەن مالىمدەمەدە.
وقي وتىرىڭىز: المازبەك اتامبايەۆ ميتينگشىلەردى باسقارىپ ءجۇر (فوتو)
پىكىر قالدىرۋ