​بۇگىن جاسىل جەلەككە ورانىپ، توتىداي تۇرلەنگەن تالدىقورعاندا «قالا كۇنى» مەرەكەسى تويلاندى. جەتىسۋدىڭ جۇرەگىنە اينالعان شاھاردىڭ مەرەكەسىنە وراي 150-گە جۋىق وتباسى ءۇيلى بولدى.

​ اۋەلى تالدىقورعان قالاسىنىڭ اكىمى عالىمجان ءابدىرايىموۆ كوتەدجدى قالاشىققا، «كوكتەم» شاعىن اۋداندارىنا بارىپ، الەۋمەتتىك از قامتىلعان وتباسىلارعا، جالعىزباستى، كوپبالالى انالارعا، جەتىم بالالار، I-II توپتاعى مۇمكىندىگى شەكتەۋلى جاندارعا پاتەر كىلتىن تابىستاپ، ىزگى تىلەگىن ءبىلدىردى.

– بۇگىن تالدىقورعاندىقتار ءۇشىن – قوس مەرەكە. قالا كۇنى مەرەكەسىمەن قاتار بۇگىن 131 وتباسى ءۇيلى بولىپ، قۋانىشقا كەنەلۋدە. اتاپ ايتساق، جاڭا عانا كوتتەدجدى قالاشىقتا 71 ازامات جاڭا ءۇيدىڭ كىلتىن السا، وسى جەردە 60 وتباسى باسپانالى بولعالى تۇر. «تۋعان ءۇيدىڭ ءتۇتىنى دە جىلى» دەگەن ءسوز بار. وسى شاڭىراق سىزدەرگە قۇت-بەرەكە اكەلسىن، جاڭا ۇيدە وسىپ-ونە بەرىڭىزدەر! مۇنداي قۋانىشتارعا قول جەتكىزۋ – وبلىس ورتالىعى تالدىقورعان قالاسىنىڭ كۇننەن كۇنگە دامىپ، وركەندەپ كەلە جاتقانىنىڭ كۋاسى. سوڭعى جىلداردا قالادا 6-شى، 7ء-شى، 8ء-شى شاعىن اۋداندار، كوتتەدجدى قالاشىق بوي كوتەرىپ، تۇرعىن ۇيگە مۇقتاج وتباسىلار باسپانالى بولۋدا. بۇل جۇمىستار مەملەكەتتىك باعدارلامالاردىڭ ءتيىمدى ىسكە اسىرىلۋىنىڭ ناتيجەسىندە، ەڭ الدىمەن  ەلباسىمىزدىڭ، پرەزيدەنتىمىزدىڭ تىكەلەي قولداۋىنىڭ ارقاسىندا جۇزەگە استى. حالىقتىڭ ءال-اۋقاتىن ارتتىرۋ، قولجەتىمدى باسپانامەن قامتۋ تۋرالى تاپسىرمالارىنىڭ اياسىندا ورىندالدى. جالپى قالاشىقتا بارلىعى 620 تۇرعىن ءۇي بەرىلەتىن بولادى. قازىرگى تاڭدا سونىڭ 200-دەن استامى بەرىلىپ ۇلگەردى. ەندى وبلىس باسشىسى اماندىق باتالوۆتىڭ ارنايى تاپسىرماسىمەن جەلتوقسان ايىندا تاعى 48 كوتتەدجدى قولدانىسقا برەۋ جوسپارىمىزدا بار، — دەدى عالىمجان رايىل ۇلى.

مەرەكە قارساڭىندا باسپانا باقىتى بۇيىرىپ، ءۇيءلى بولعان جاندار شەكسىز ريزاشىلىعىن ءبىلدىرىپ، اقجارما تىلەكتەرىن اقتاردى.

​اتالمىش شارا «سالتانات سارايىندا» جالعاسىن تاپتى. باسقوسۋدا الماتى وبلىسىنىڭ اكىمى اماندىق باتالوۆ جۇرتشىلىقتى مەرەكەلەرىمەن قۇتتىقتادى.

– تالدىقورعان قالاسىنىڭ ءتول مەرەكەسى، قالا كۇنى وزدەرىڭىزبەن جۇزدەسىپ، ارنايى قۇتتىقتاپ، مەرەكەنى سالتاناتتى جاعدايدا وتكىزۋدى ءجون كوردىك.  بۇگىنگى مەرەكەنى قالالىقتار ەرەكشە قۋانىشپەن اتاپ ءوتۋدە. جاڭا عانا ءبىز 131 وتباسىعا جاڭا تۇرعىن ۇيلەردىڭ كىلتتەرىن تابىس ەتتىك. سول كوتەرىڭكى كوڭىل كۇي وسى جەردە جالعاسىن تاۋىپ، سىزدەرمەن جۇزدەسىپ وتىرمىز.

بيىلعى جىل ءبىرشاما قيىندىقتار تۋعىزعانىمەن، جالپى الماتى وبلىسىنىڭ، سونىڭ ىشىندە تالدىقورعان  قالاسىنىڭ وسىپ-وركەندەۋىندە تۇراقتىلىقتى ساقتاي الدىق. ​ەلباسىنىڭ تاپسىرمالارىنا، مەملەكەت باسشىسىنىڭ الدىمىزعا قويعان مىندەتتەرىنە سايكەس اۋىل شارۋاشىلىعىندا، قۇرىلىس سالاسىندا جۇمىستار قارقىندى ءجۇردى. مەملەكەتتىك باعدارلامالاردىڭ اياسىندا اتقارىلعان جۇمىستار ءوز ناتيجەسىن كورسەتىپ، حالىقتىڭ تۇرمىسىن جاقسارتۋعا زور ىقپال ەتتى، – دەي كەلە ءوڭىر جەتىستىگىنە توقتالدى.سونداي-اق، ەلىمىزدى ىندەت جايلاعان كەزدە كۇن-تۇن دەمەي قىمەت ەتكەن اق حالاتتى ابزال جاندارعا 16 پاتەر كىلتىن تابىستالدى.

جيىن بارىسىندا تالدىقورعان قالاسىنىڭ اكىمى عالىمجان ءابدىرايىموۆ جۇرتشىلىقتى مەرەكەمەن قۇتتىقتاپ، شاھاردىڭ دامۋى مەن وركەندەۋى جولىنا ۇلەسىن قوسقان زيالى جاندارعا «تالدىقورعان قالاسىنىڭ قۇرمەتتى ازاماتى» اتاعىن تابىس ەتتى. اتاپ ايتساق، الماتى وبلىسى جانە قازاقستان رەسپۋبليكاسىنىڭ  سپورت سالاسىندا ەڭبەگى سىڭگەن ازامات راحىمبەك تولەندىنوۆ، بيكەن ريموۆا  اتىنداعى تالدىقورعان دراما تەاترىنىڭ ءارتىسى ماكەن نۇرمۇحامبەتوۆا، تالدىقورعان وباعا قارسى كۇرەس ستانسياسى ديرەكتورىنىڭ ورىنباسارى ۆالەريي ساپوجنيكوۆ، زەينەتكەر حابدۋللا  يبرايىمحانوۆ، "JLC ءسۇت" جشس-نىڭ ديرەكتورى ولگا بوگدانوۆا «تالدىقورعان قالاسىنىڭ قۇرمەتتى ازاماتى» توسبەلگىسىن تاقتى.

سونىمەن قاتار، قالا كۇنى مەرەكەسى اياسىندا وتكەن «جاسا، جاينا – تالدىقورعان»، «ارۋ قالا – تالدىقورعان»  سىندى ءتۇرلى چەلەندجدەردە ۇزدىك شىققان جاندارعا ءبىرقاتار اتالىم بويىنشا ماراپات تابىس ەتىلدى.