اقمولا وبلىسى ششۋچينسك قالاسىندا Lexus اۆتوكولىگىنىڭ قاتىسۋىمەن جول اپاتى بولىپ، ەكى پوليسەي قازا تاپتى. وقيعا سىرتقى بەينەباقىلاۋ كامەراسىنىڭ وبەكتيۆىنە ءتۇسىپ قالعان، دەپ حابارلادى اقمولا وبلىسى پد-نىڭ باسپا ءسوز قىزمەتى.

قايعىلى وقيعا 15 قازاندا ششۋچينسك قالاسىنداعى ابىلاي حان جانە سەيفۋللين كوشەلەرىنىڭ قيىلىسىندا بولعان.

"ابىلاي حان كوشەسىمەن كەلە جاتقان Lexus NX 200 اۆتوكولىگىنىڭ جۇرگىزۋشىسى بۋراباي وكم جەرگىلىكتى پوليسيا قىزمەتى ءبولىمىنىڭ Lada 21214 قىزمەتتىك اۆتوكولىگىمەن سوقتىعىسقان.

LADA 21214 قىزمەتتىك اۆتوكولىگىنىڭ جۇرگىزۋشىسى مەن جولاۋشىسى - بۋراباي اپب جپق ۋچاسكەلىك پوليسيا ينسپەكتورلارى. العان جاراقاتتارىنان ولار وقيعا ورنىندا قايتىس بولدى" دەلىنگەن حابارلامادا.

اپاتقا ششۋچينسك قالاسىنىڭ 25 جاستاعى تۇرعىنى كىنالى بولىپ شىقتى. بۇرىن ول قك-نىڭ "ءاۆتوموبيلدى نەمەسە وزگە دە كولىك قۇرالىن ۇرلاۋ ماقساتىنسىز زاڭسىز يەلەنۋ"، سونىمەن قاتار "كولىك قۇرالدارىن جۇرگىزۋ قۇقىعىنان ايىرىلعان جانە الكوگولدىك، ەسىرتكىلىك جانە ۋىتقۇمارلىق ماساڭ كۇيدەگى ادامنىڭ كولىك قۇرالىن باسقارۋى، سول سياقتى كولىك قۇرالىن باسقارۋدى وسىنداي ادامعا بەرۋ نەمەسە وسىنداي ادامنىڭ كولىك قۇرالىن باسقارۋعا جىبەرىلۋى" باپتارى بويىنشا بىرنەشە رەت سوتتالعان.

جىگىتتىڭ 2022 جىلعا دەيىن رۋلگە وتىرۋعا قۇقىعى جوق ەكەنى بەلگىلى بولدى. قايعىلى وقيعادان كەيىن ول قاماۋعا الىندى.

"قازىرگى ۋاقىتتا اتالعان فاكتى بويىنشا قىلمىستىق كودەكستىڭ 345-بابى 4-بولىگى "كولىك قۇرالدارىن باسقاراتىن ادامداردىڭ جول قوزعالىسى نەمەسە كولىك قۇرالدارىن پايدالانۋ ەرەجەلەرىن بۇزۋى" بويىنشا سوتقا دەيىنگى ءىس قوزعالدى" دەپ تولىقتىردى پوليسيا دەپارتامەندەگىلەر.