قىرعىزستان پرەزيدەنتى سوورونباي جەەنبەكوۆ بۇگىن، 15 قازاندا ەلدەگى قالىپتاسقان قوعامدىق-ساياسي جاعدايعا بايلانىستى قىرعىزستاندىقتارعا ۇندەۋ جاساپ، وتستاۆكاعا كەتۋ تۋرالى شەشىم قابىلداعانىن مالىمدەدى، دەپ حابارلادى Sputnik Kyrgyzstan.
سوورونباي جەەنبەكوۆ ەلدە وزىنە قارسى اگرەسسيا باسىلماي تۇرعانىن ايتتى.
"قىمباتتى وتانداستار! ەلىمىزدىڭ استاناسى – بىشكەكتەگى قوعامدىق-ساياسي جاعداي شيەلەنىسە تۇسۋدە. كەشە جوگوركۋ كەنەش ۇكىمەت قۇرامىن بەكىتتى، مەن قىرعىزستان پرەزيدەنتىنىڭ ءتيىستى تاعايىنداۋلار تۋرالى جارلىقتارىنا قول قويدىم. ءبىراق بۇل شيەلەنىستى جەڭىلدەتكەن جوق. وكىنىشكە قاراي، اگرەسسيا ازايمادى، مەنىڭ تەز ارادا وتستاۆكاعا كەتۋىم تۋرالى تالاپ ءالى جالعاسۋدا. قازىرگى جاعداي ەكى جاقتى قاقتىعىسقا جاقىن. ءبىر جاعىنان – نارازىلىق بىلدىرۋشىلەر، ەكىنشى جاعىنان-قۇقىق قورعاۋ ورگاندارى. اسكەري قىزمەتشىلەر مەن قۇقىق قورعاۋ ورگاندارى مەملەكەتتىك رەزيدەنسيانى قورعاۋ ءۇشىن قارۋ قولدانۋعا مىندەتتى. بۇل جاعدايدا ءسوزسىز قان توگىلەدى. ەكى تاراپتى دا ارانداتۋشىلىققا ەرمەۋگە شاقىرامىن.
قىمباتتى مەنىڭ وتانداستارىم! مەن ءۇشىن قىرعىزستانداعى بەيبىتشىلىك، ەلدىڭ تۇتاستىعى، حالقىمىزدىڭ بىرلىگى جانە قوعامداعى تىنىشتىق بارىنەن جوعارى. مەن ءۇشىن ءاربىر وتانداسىمنىڭ ومىرىنەن قىمبات ەشتەڭە جوق. مەنىڭ بيلىككە تالاسىم جوق. قىرعىزستان تاريحىندا ءوز ازاماتتارىنا قان توككەن جانە وق اتقان پرەزيدەنت رەتىندە قالعىم كەلمەيدى. سوندىقتان وتستاۆكاعا كەتۋ تۋرالى شەشىم قابىلدادىم. جاپاروۆ پەن باسقا دا ساياساتكەرلەردى ءوز جاقتاستارىن ەل استاناسىنان شىعارىپ، بىشكەك تۇرعىندارىنا بەيبىت ءومىردى قايتارۋعا شاقىرامىن. ەشبىر بيلىك ءبىزدىڭ ەلىمىزدىڭ تۇتاستىعى مەن قوعامداعى كەلىسىمىنە قارسى تۇرا المايدى. جاراتقان بىزگە جار بولسىن، جەرىمىزدە بەيبىتشىلىك پەن تىنىشتىق بولسىن!" دەلىنگەن جەەنبەكوۆ مالىمدەمەسىندە.
پىكىر قالدىرۋ