سونداي-اق كورمەگە شىعىس قازاقستان ونەر مۇراجايى مەن نيەۆزوروۆتار وتباسى اتىنداعى بەينەلەۋ ونەرى مۇراجايىنىڭ قورلارىنداعى 18 سۋرەت قويىلدى. قاسىم-جومارت توقايەۆ "ۇلى دالا التىنى" ارحەولوگيالىق كورمەسىن ارالاپ كورگەننەن كەيىن ابايتانۋشى عالىمدارمەن كەزدەستى.

– بيىلدان باستاپ 10-تامىز "اباي كۇنى" دەپ بەكىتىلىپ، مەرەكەلەر قاتارىنا قوسىلدى. اقىننىڭ ەڭبەكتەرى ون تىلگە اۋدارىلىپ، الەمنىڭ بەدەلدى كىتاپحانالارىنا جىبەرىلدى. شەتەلدەگى ەلشىلىكتەرىمىزدىڭ جانىنان اباي ورتالىقتارى اشىلدى. ءبىراق بۇل تەك العاشقى قادام عانا، كەلەشەكتە مۇمكىندىككە قاراي اباي ينستيتۋتتارىن اشامىز دەپ ويلايمىن. ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتىندە اباي اكادەمياسى قۇرىلدى. بۇدان بىلاي اكادەميا اقىن شىعارماشىلىعىن جۇيەلى زەرتتەۋمەن اينالىسادى. "اباي" تەلەارناسى ءوز جۇمىسىن باستادى. جوعارى وقۋ ورىندارىندا "ابايتانۋ" كۋرسىن وقىتۋ قولعا الىندى. قازاق قوعامىندا وزىندىك ورنى بار سەمەي قالاسى "تاريحي ورتالىق" رەتىندە بەلگىلەندى. وسىنداي يگى شارالار ۇلى ويشىلدىڭ باعا جەتپەس مۇراسىن جاس ۇرپاقتىڭ ساناسىنا ءسىڭىرۋ ءۇشىن جاسالدى. بۇكىل تۇركى الەمىندە اباي فيلوسوفياسىن دارىپتەۋ ىسىندە ايتارلىقتاي تابىسقا قول جەتكىزدىك، – دەدى پرەزيدەنت.

توقايەۆ گۋمانيتارلىق سالانى دامىتۋدى قولعا السدىڭ ماڭىزىنا توقتالىپ، قازاق ءتىلى مەن ادەبيەتىن وقىتۋعا جانە ساپالى وقۋلىق دايىنداۋعا باسا ءمان بەرۋ قاجەتتىگىنە نازار اۋداردى.

– ءبىز انا ءتىلىمىز بەن ءتول ادەبيەتىمىزدىڭ قادىر-قاسيەتىن بالالارعا مەكتەپ جاسىنان باستاپ ءسىڭىرۋىمىز كەرەك. بۇل باعىتتا ءبىرىڭعاي ۇستانىم قاجەت. وسىعان وراي الماتىداعى  اباي اتىنداعى مەكتەپ-ينتەرناتتىڭ مۇمكىندىكتەرىن تولىق پايدالانعان ءجون. قازاق ءتىلى مەن ادەبيەتىن تەرەڭدەتە وقىتاتىن بۇل مەكتەپتىڭ وقۋ ۇدەرىسى باسقا مەكتەپتەرگە ۇلگى بولادى دەپ ويلايمىن. ونى زاماناۋي تالاپقا ساي جان-جاقتى جەتىلدىرىپ، "اباي مەكتەبى" دەپ اتالاتىن ەڭ ۇزدىك ءبىلىم ورداسىنا اينالدىرۋ قاجەت. جالپى ءبىز كەلەشەكتە اباي مەكتەپتەرىن اشۋ تۋرالى ويلانۋىمىز كەرەك، – دەدى مەملەكەت باسشىسى.