ىشكى ىستەر ءمينيسترى ەرلان تۇرعىمبايەۆ بۇگىن قىزمەتتىك بورىشىن اتقارۋ كەزىندە قازا تاپقان ۋچاسكەلىك پوليسيا ينسپەكتورلارى قانات وتاربايەۆ پەن قانات ءحاميدۋلليننىڭ وتباسىلارىنا كوڭىل ايتتى. بۇل تۋرالى مينيسترلىكتىڭ رەسمي سايتى مالىمدەدى.

– ولاردىڭ كاسىبيلىگى مەن پاراساتتىلىعىن، ءوز قىزمەتىنە ادالدىعىن باسشىلىق تا، حالىق تا باعالاعان. ولار ارىپتەستەرىنىڭ اراسىندا سىيلى بولدى. ىشكى ىستەر ورگاندارىنىڭ بارلىق جەكە قۇرامى قازا تاپقانداردىڭ تۋىستارى مەن جاقىندارىمەن بىرگە قايعىرادى، – دەدى مينيستر ەرلان تۇرعىمبايەۆ.

بۇگىن شۋچينسك قالاسىندا جول-كولىك وقيعاسىنان ەكى پوليسەي قايتىس بولعان. پوليسيا قىزمەتكەرلەرى جەدەل-ىزدەستىرۋ ءىس-شارالارىنا قاتىسىپ، وقيعا ورنىنان قايتىپ كەلە جاتقان. وسى كەزدە "لەكسۋس" كولىگىنىڭ جۇرگىزۋشىسى جول ەرەجەلەرىن ەلەمەي، باعدارشامنىڭ قىزىل شامىنان جوعارى جىلدامدىقپەن ءوتىپ، "نيۆا" قىزمەتتىك كولىگىمەن سوقتىعىسقان. پوليسيا قىزمەتكەرلەرى العان جاراقاتتىڭ سالدارىنان وقيعا ورنىندا كوز جۇمدى.

ىشكى ىستەر مينيسترلىگى مالىمەتىنشە، جۇرگىزۋشى بۇرىن كولىكتى ماس كۇيدە جۇرگىزگەنى ءۇشىن جۇرگىزۋشى كۋالىگىنەن ايىرىلعانى انىقتالدى. قازىرگى ۋاقىتتا كۇدىكتى اۋرۋحانادا پوليسەيلەردىڭ كۇزەتىندە. ق ر قىلمىستىق كودەكسىنىڭ 345-بابىنىڭ 4-بولىگى بويىنشا سوتقا دەيىنگى تەرگەۋ جۇرگىزىلۋدە، بۇل باپتا 10 جىلعا دەيىنگى مەرزىمگە باس بوستاندىعىنان ايىرۋ جازاسى كوزدەلگەن.

قازا تاپقان پوليسيا كاپيتانى قانات وتاربايەۆ ىشكى ىستەر ورگاندارىندا 16 جىل قىزمەت ەتكەن. ءوزىنىڭ قىزمەتتىك مىندەتتەرىن ادال اتقارعانى ءۇشىن 22 رەت كوتەرمەلەنگەن. ارتىندا جۇبايى مەن ءۇش بالاسى قالدى، ولاردىڭ ەڭ كىشىسى 3 جاستا.

قازا تاپقان ەكىنشى پوليسيا كاپيتانى قانات حاميدۋللين ىشكى ىستەر ورگاندارىندا 12 جىل قىزمەت ەتكەن جانە وسى ۋاقىت ىشىندە 23 رەت كوتەرمەلەنگەن. مارقۇمنىڭ ارتىندا جۇكتى ايەلى مەن جەتى جاسار ۇلى قالدى.