تالدىقورعان قالاسىنىڭ ورتالىق الاڭىندا دەنساۋلىق ساقتاۋ ۇيىمدارىنا «جەدەل جاردەم» كولىكتەرىنىڭ كىلتى تاپسىرىلدى. سالتاناتتى شاراعا وبلىس اكىمى اماندىق باتالوۆ قاتىستى.

مەملەكەت باسشىسى قاسىمجومارت توقايەۆ جولداۋىندا: «ۇلتتىق دەنساۋلىق ساقتاۋ سالاسىن ودان ءارى دامىتۋ جونىندەگى شارالار بارلىق مەديسينالىق مەكەمەلەرىن قاجەتتى قۇرال-جابدىقتارمەن تولىق جاراقتاندىرۋعا، ناۋقاستارعا ارنالعان ورىندار قورىن 50 پايىزعا جاڭارتۋعا، ەسكىرگەن ينفراقۇرىلىمدى اۋىستىرۋعا، ءومىر ۇزاقتىعىن بولجامدى 75 جاسقا دەيىن جەتكىزۋگە مۇمكىندىك بەرەدى»، – دەپ حالىقتىڭ دەنساۋلىعىن نىعايتۋدى نەگىزگى مىندەت رەتىندە اتاپ كورسەتكەن ەدى. مەملەكەت باسشىسىنىڭ تاپسىرماسىنا وراي وبلىس ورتالىعىندا جاڭا 200 ورىندى ينفەكسيالىق اۋرۋحانا بوي كوتەرىپ، زامان تالابىنا ساي مەديسينالىق قۇرالدارمەن جابدىقتالدى. حالىق دەنساۋلىعىن نىعايتۋ ماقساتىندا مەديسينا سالاسىنا 305 جاس مامان جۇمىسقا تارتىلدى. جىل سوڭىنا دەيىن تاعى 64 مامان جۇمىسقا قابىلدانباق. اق حالاتتى مامانداردى تۇراقتاندىرۋ ماقساتىندا بيىل وبلىستا 127 پاتەر ساتىپ الىندى. كەلەر جىلى وبلىس ورتالىعىندا مەديسينا قىزمەتكەرلەرىنە ارنالعان 60 پاتەرلى تۇرعىن ءۇي بوي كوتەرەدى دەپ جوسپارلانۋدا.

دەنساۋلىق سالاسى قىزمەتكەرلەرىنە مەديسينالىق كولىكتىڭ كىلتىن وبلىس اكىمى اماندىق باتالوۆ سالتاناتتى جاعدايدا تابىستاپ، پاندەميا كەزىندە قاجىر-قايراتىن اياماي قىزمەت ەتكەن دارىگەرلەرگە ريزاشىلىعىن ءبىلدىردى.

– حالىق – مەملەكەتتىڭ باستى بايلىعى. سول سەبەپتى ءبىز ءبىرىنشى كەزەكتە ەلدىڭ اماندىعىن ويلاۋىمىز كەرەك. ىندەت ەلگە ەنگەلى ءبىرشاما اۋىر جاعدايدى باستان كەشىردىك. ءبىرىنشى تولقىندا كەمشىلىك تە ورىن الدى. ەندى ونداي ولقىلىققا ورىن بەرمەۋىمىز كەرەك. پاندەميامەن كۇرەسكە جەرگىلىكتى بيۋدجەتتەن 13،8 ميلليارد تەڭگە ءبولىندى. ونىڭ 8،8 ميلليارد تەڭگەسى ەكىنشى تولقىننىڭ دايىندىق جۇمىسىنا جۇمسالدى. اتالعان قاراجاتقا 3 كومپيۋتەرلىك توموگرافيا، 18 رەنتگەن اپپاراتى، 150 وكپەنى جاساندى جەلدەتۋ اپپاراتى الىندى. سونىمەن قاتار، وبلىستىڭ 13 اۋرۋحاناسى وتتەگى ستانسىلارىمەن جانە 1070 وتتەگى كونسەنتراتورىمەن قامتىلدى. جالپى، ەكىنشى تولقىنعا 5 مىڭ 280 توسەك-ورىن دايىندالدى. 180 «جەدەل جاردەم» كولىگى مەن 12 جىلجىمالى مەديسينالىق كەشەن ساتىپ الىندى. ناتيجەسىندە، «جەدەل جاردەم» بريگادالارىنىڭ سانى 165-تەن 205-كە كوبەيدى. ەندى حالىققا تەك ساپالى قىزمەت كورسەتۋىمىز كەرەك. ەڭ باستىسى – حالىق مەديسينا ماماندارىنىڭ ايتقان كەڭەسىنە قۇلاق ءتۇرىپ، بارلىق ساقتىق شارالارىن ورىنداسا بولعانى. جاقىندارىمىزعا جاناشىر بولىپ، تارتىپكە باعىنىپ ءجۇرۋدى ۇمىتپايىق. جاۋاپكەرشىلىكتى ءاربىر ادام سەزىنسە دەيمىن. ويتكەنى، ادام ومىرىنەن ارتىق ەشتەڭە جوق. سوندىقتان، وسىنداي سىن ساعاتتا ىنتىماعى جاراسقان حالقىمىز جۇدىرىقتاي جۇمىلىپ، ىندەتپەن بىرگە كۇرەسۋگە ءتيىس، – دەگەن وبلىس باسشىسى اۋدان، قالا اۋرۋحانالارىنىڭ ديرەكتورلارىنا «جەدەل جاردەم» كولىكتەرىنىڭ كىلتىن تابىس ەتتى.

بۇل كولىكتەر زامان تالابىنا ساي ارنايى تەحنيكالارمەن جابدىقتالعان. كولىكتە قوسىمشا رەانيماسيالىق باعىتتاعى، ياعني، ينسۋلت العاندارعا، جۇرەك تالماسىنا شالدىققاندارعا جىلدام كومەك كورسەتۋ ءۇشىن ارنايى مەديسينالىق قۇرال-جابدىقتىڭ بارلىق ءتۇرى ورناتىلعان. دياگنوستيكالىق مەديسينالىق كەشەن ىشىندە ناۋقاستاردى قابىلداۋ بولمەسى، رەنتگەن، ۋلترادىبىستىق زەرتتەۋ جاسايتىن ءتۇرلى زاماناۋي قۇرالدار، اكۋشەر-گينەكولوگ مامانداردىڭ جەكە كابينەتى، ارنايى زەرتحانا، رادياسيالىق دياگنوستيكا، جالپى دارىگەرلەردىڭ تاجىريبە الماسۋ ايماعى ورنالاسقان. مۇمكىندىگى شەكتەۋلى ازاماتتارعا ارنالعان پاندۋسليفت تا قاراستىرىلعان. وبلىستىق جەدەل جانە شۇعىل مەديسينالىق كومەك ستانسىسىنىڭ اعا فەلدشەرى شولپان نۇرعالييەۆا جاڭا «جەدەل جاردەم» كولىگىندە ورنالاسقان قۇرىلعىلارمەن تانىستىردى. ونىڭ ايتۋىنشا، بارلىق مەديسينالىق قۇرىلعى گەرمانيا مەملەكەتىندە شىعارىلعان. ءبىرىنشى مەديسينالىق كومەككە قاجەتتى وزىق تەحنولوگيالىرمەن جابدىقتالعان. ەڭ باستىسى، بارلىق «جەدەل جاردەم» كولىگىندە وكپەنى جاساندى جەلدەتۋ اپپاراتى ورنالاستىرىلعان.

سالتاناتتى شارا سوڭىنان وبلىستىق جەدەل جانە شۇعىل مەديسينالىق كومەك ستانسىسىنىڭ باسشىسى ساۆەليي پاك پرەزيدەنت قاسىم-جومارت توقايەۆقا، وبلىس اكىمى اماندىق باتالوۆقا مەديسنا قىزمەتكەرلەرىنىڭ اتىنان العىس ايتىپ، حالىقتىڭ اماندىعى جولىندا تالماي ەڭبەك ەتەتىندىگىن جەتكىزدى. كەربۇلاق اۋداندىق انالار كەڭەسىنىڭ ءتورايىمى عاليا اقباسوۆا دا اق حالاتتى ابزال جانداردىڭ جۇمىسىنا تابىس تىلەپ، انالىق العىس ايتتى.