ارمەنيا استاناسى ەريەۆاننىڭ تاۋەلسىزدىك الاڭىندا تاعى ميتينگ ءوتتى. نارازى توپتىڭ تالابى وزگەرگەن جوق. ولار پرەمەر-مينيستر نيكول پاشينياننىڭ وتستاۆكاعا كەتكەنىن قالايدى. بۇل تۋرالى ria.ru حابارلادى. 

– پاشينيان كەتۋى كەرەك، ويتكەنى ونىڭ جەڭىل-جەلپى باسقاراتىن بيلىگى كەزىندە ءبىز جاعدايدى وزگەرتە المايمىز. ءبىزدىڭ ەل ەندى ەڭسەسىن تىكتەي المايتىن بولدى، – دەدى وپپوزيسيالىق "داشناكسۋتيۋن" پارتياسىنىڭ وكىلى گەگام مانۋكيان.

اكسياعا سارسەنبىدە  "زاڭمەن بەلگىلەنگەن ءتارتىپتى بۇزاتىن جيىنداردى وتكىزۋ جانە ۇيىمداستىرۋ" بابى بويىنشا  ارنايى تەرگەۋ قىزمەتىنە شاقىرىلعان وپپوزيسيا جەتەكشىلەرى قاتىسۋدا. بۇل باپ بويىنشا ەڭ جوعارى ۇكىم – ەكى اي كولەمىندە قاماۋعا الۋ.

ميتينگكە مىڭداعان ادام كەلدى. پوليسيا مەرزىمدى تۇردە نارازىلىقتى توقتاتۋعا شاقىردى، ويتكەنى ەلدەگى اسكەري جاعدايعا بايلانىستى ميتينگكە تىيىم سالىنعان.

بۇعان دەيىن، ارمەنيا مەن ازەربايجان اراسىنداعى تاۋلى قاراباق ءۇشىن بولعان 44 كۇندىك سوعىستا ارميان كۇشتەرى 2،3 مىڭنان استام اسكەرىنەن ايىرىلعانى حابارلانعان. 10 قاراشا كۇنى ارمەنيا پرەمەر-مينيسترى نيكول پاشينيان ازەربايجان پرەزيدەنتى يلحام الييەۆ جانە رەسەي پرەزيدەنتى ۆلاديمير پۋتين تاۋلى قاراباقتا اسكەري ارەكەتتەردى توقتاتۋ تۋرالى كەلىسىمگە قول قويعان. سول كەلىسىم جاسالعان كۇننەن باستاپ ارمەنيادا نارازىلىقتار مەن قىزۋ پىكىرتالاستار جالعاسىپ كەلەدى.