ارمەنيا پرەمەر-مينيسترى نيكول پاشينيان ءۇش كۇن قاتارىنان كاسىپكەرلەرمەن ەلدەگى ەكونوميكالىق جانە ينۆەستيسيالىق قىزمەتتى قالپىنا كەلتىرۋ ماسەلەلەرىن تالقىلاپ جاتىر. بۇل تۋرالى armeniasputnik.am سايتى حابارلادى.
ۇكىمەتتىڭ باسپا ءسوز قىزمەتىنىڭ حابارلاۋىنشا، سارسەنبىدە پاشينيان "Elseti Armenia" كومپانياسىنىڭ باس ديرەكتورى كارەن ارۋتيۋنيانمەن، "گازپروم ارمەنيا" باسشىسى حرانت تاديەۆوسيانمەن، "رەنشين" قۇرىلىس جانە ينۆەستيسيالىق ۇيىمىنىڭ ديرەكتورى نۋشيكيانمەن كەزدەسكەن.
– ۇكىمەت پەن ىسكەرلىك ورتا اراسىنداعى بايلانىستى نىعايتۋ، ينۆەستيسيالىق باعدارلامالاردى جۇزەگە اسىرۋدى جالعاستىرۋ، ەكونوميكالىق ءوپتيميزمدى قالپىنا كەلتىرۋ ماسەلەلەرى تالقىلاندى. ناقتى كەلىسىمدەرگە قول جەتكىزىلدى، – دەلىنگەن حابارلامادا.
باسىلىمنىڭ حابارلاۋىنشا، پرەمەر-مينيسترلەر كاسىپكەرلەرمەن كەزدەسۋ وتكىزىپ، ەلدەگى احۋالدى جاقسارتۋدىڭ امالىن ىزدەپ جۇرگەندە، بۇگىن (25 قاراشا) ەريەۆانداعى ۇلتتىق عىلىم اكادەمياسىنىڭ پرەزيديۋمى ونىڭ وتستاۆكاعا كەتۋىن تالاپ ەتىپ، مالىمدەمە جاساعان.
ۇلتتىق عىلىم اكادەمياسى قاراباققا قاتىستى شەشىمدى، ياعني ءۇشجاقتى مالىمدەمەنى ارميان حالقى ءۇشىن "ماسقارا" دەپ سانايدى.
سونىمەن قاتار بۇگىن ەريەۆاننىڭ ورتالىعىنداعى ارمەنيا ۇكىمەتى عيماراتىنىڭ جانىندا "داشناكسۋتيۋن" ساياسي پارتياسىنىڭ وكىلى گەگام مانۋكيان مەن كونستيتۋسيالىق سوتتىڭ ەكس-سۋدياسى كيم بالايان اشتىق جاريالادى. ولار ارمەنياداعى تۇراقتىلىقتى قالپىنا كەلتىرۋ جانە پاشينياننىڭ وتستاۆكاعا كەتۋىنتالاپ ەتتى.
ارمەنيا ۇلتتىق قاۋىپسىزدىك قىزمەتىنىڭ بۇرىنعى ديرەكتورى، "وتان" پارتياسىنىڭ جەتەكشىسى ارتۋر ۆانەسيان جۋرناليستەرگە پاشينياننىڭ قىزمەتىنەن كەتۋىن كوپشىلىك قالايتىنىن مالىمدەگەن.
بۇعان دەيىن ارمەنيا پرەمەر-مينيسترى نيكول پاشينيان ازەربايجان پرەزيدەنتى يلحام الييەۆ جانە رەسەي پرەزيدەنتى ۆلاديمير پۋتين تاۋلى قاراباقتا اسكەري ارەكەتتەردى توقتاتۋ تۋرالى كەلىسىمگە قول قويعان. وسىلايشا ءۇش ەلدىڭ اراسىندا بولعان كەلىسىم بويىنشا 3 اۋدان ازەربايجانعا قايتارىلىپ، باسقىنشى اسكەر ايماقتان شىعارىلادى. بۇل كەلىسىمنەن كەيىن ارمەنيا استاناسى ەريەۆاندا پرەمەر-مينيسترگە قارسى ميتينگتەر ءوتىپ، سودان بەرى حالىق پاشينياننىڭ وتستاۆكاعا كەتۋىن تالاپ ەتىپ كەلەدى.
