مەملەكەت باسشىسى قاسىم-جومارت توقايەۆ: «ەرىكتىلىك – ەڭ الدىمەن وركەنيەتتى ەلدىڭ جانە زور جاۋاپكەرشىلىكتىڭ بەلگىسى» دەگەن بولاتىن. قازىرگى تاڭدا الماتى وبلىسى بويىنشا ەرىكتىلەردىڭ ۇيىتقى بولۋىمەن جىل باسىنان باستاۋ العان قايىرىمدىلىق اكسيالارى جالعاسىن تابۋدا.
الماتى وبلىسىنىڭ توتەنشە جاعدايلار دەپارتامەنتىنىڭ مالىمەتى بويىنشا سوڭعى كۇندەرى وبلىس اۋماعىندا 20 سم-گە دەيىن قالىڭ قار تۇسكەن. وسىعان وراي، الماتى وبلىسى جاستار ساياساتى ماسەلەلەرى باسقارماسىنىڭ ۇيىمداستىرۋمەن ءوڭىر ەرىكتىلەرىمەن قايىرىمدىلىق اكسياسى باستاۋ الدى. اكسيا اياسىندا الەۋمەتتىك كومەكتى قاجەت ەتەتىن زەينەتكەرلەردىڭ، مۇمكىندىگى شەكتەۋلى جانداردىڭ جانە جالعىزباستى قارتتاردىڭ اۋلاسىن قاردان تازارتۋ جۇمىستارى جۇرگىزىلدى. سونداي-اق، قاجەتتى ازىق-تۇلىك جەتكىزدى. بارلىق اۋدان، قالالاردى قامتىعان ىزگى شارانىڭ العاشقى كۇنىندە-اق ەرىكتىلەر 200 وتباسىنا كومەك كورسەتىپ ۇلگەردى. اتالمىش اكسيا الداعى ۋاقىتتا دا جالعاسىن تاپپاق.
مەملەكەت باسشىسى قاسىم-جومارت توقايەۆ حالىققا ارناعان جولداۋىندا ەرىكتىلەردىڭ ورنى ەرەكشە ەكەنىن اتاپ ءوتتى. قايىرىمدى ىسپەن اينالىسۋ سىندى ىزگى امال جاساۋدى ازاماتتىق پارىز سانايتىن وبلىس ەرىكتىلەرى بۇل ىستەن كەندە قالىپ جاتقان جوق. جاقسىلىق جاساۋعا جانى قۇمار جانداردىڭ ارقاسىندا كوپتەگەن قايىرىمدى يگى-شارا اتقارىلارى ءسوزسىز.
پىكىر قالدىرۋ