قامشى پورتالى كوتەرگەن ماسەلە وڭ شەشىمىن تاپتى. 6 جەلتوقسان كۇنى سايتىمىزدا "قازاق شەكاراسىنان قازاقتار عانا كىرە الماي جاتىر" دەگەن اتپەن ماقالا جاريالانعان. ماقالادا الماتى حالىقارالىق اۋەجايىنا قونعان ەتنيكالىق قازاقتى (جۇڭگو ازاماتى) ۆيزاسىنىڭ، پسر تەستتىڭ تەرىس ناتيجەسى بارىنا قاراماستان ەل اۋماعىنا كىرگىزبەي، سەبەبىن تۇسىندىرمەستەن كەرى قايتارعانى حابارلانعان. اراعا ەكى كۇن سالعاندا تۇيىتكىل ءتۇيىنى تارقاتىلىپ، قانداسىمىز تاريحي وتانىنا كەلدى، دەپ حابارلايدى قامشى پورتالى "وتانداستار قورىنا" سىلتەمە جاساپ.
"ءسۇيىنشى! قانداسىمىز ريزا اقان قىزىنىڭ ماسەلەسى شەشىلدى
بيىل 6 جەلتوقسان كۇنى قامشى.كز سايتىندا "قازاق شەكاراسىنان تەك قازاقتار عانا كىرە الماي جاتىر" اتتى ماقالا جاريالانعان بولاتىن. ماقالادا قىتايدان تىكەلەي اۋە رەيسى بولماعاندىقتان، بىرنەشە ەلدى باسىپ، سوڭىندا دۋباي ارقىلى قازاقستانعا جەتىپ، كەيىننەن كەرى قايتارىلعان قانداسىمىز ريزا اقان قىزى تۋرالى ايتىلادى.
"وتانداستار قورى" بۇل ماسەلە جونىندە سايت رەداكسياسىمەن بايلانىسقا شىعىپ، ەلگە كىرە الماعان ريزا قارىنداسىمىز تۋرالى اقپاراتتى الدى. شۇعىل ق ر ۇقك-نىڭ شەكارا قىزمەتىنە سۇراۋ سالىپ، اتالعان قانداسىمىزعا كومەك كورسەتۋ امالدارىن قولعا الدى. مىنە، 48 ساعاتتان كەيىن تۇيتكىلدى ماسەلە وڭ شەشىمىن تاپتى.
"وتانداستار قورى" بولاشاقتا دا وسىنداي جاعدايدىڭ ورىن الۋىنا جول بەرمەۋ ءۇشىن مۇنداي ماسەلەلەردى شەشۋ تەتىكتەرىن ۇسىنىپ، ق ر اقپارات جانە قوعامدىق دامۋ مينيسترلىگى ارقىلى ءتيىستى ۆەدومستۆوارالىق كوميسسياعا ارنايى حات جولدادى.
"ءار قازاق مەنىڭ جالعىزىم" دەگەندەي قانداسىمىزعا بايلانىستى قالىپتاسقان تۇيتكىلدى جاعدايدى شەشۋگە اتسالىسقان شەكارا قىزمەتىنىڭ ديرەكتورى گەنەرال د.ديلمانوۆ مىرزا مەن قىزمەتكەرلەرىنە جانە ۇلتجاندى تۇلعا، پارلامەنت سەناتىنىڭ دەپۋتاتى مۇرات باقتيارۇلىنا، سونداي-اق ماسەلەنى دەر كەزىندە كوتەرگەن قامشى.كز سايتى ۇجىمىنا، باسقا دا كومەك قولىن سوزىپ، ماسەلەنىڭ شەشىلۋىنە تىكەلەي جانى اشىپ، ات سالىسقان بارلىق ازاماتتارعا "وتانداستار قورى" اتىنان العىسىمىزدى جەتكىزەمىز!" دەلىنگەن قور تاراتقان اقپاراتتىق حابارلامادا.
پىكىر قالدىرۋ