ءازىز ابدۋسالام اۋستراليا ازاماتى. ۇلتى – ۇيعىر. ول ايەلىن كورمەگەنىنە ءۇش جىل بولعان. ال بالاسىمەن ءبىرىنشى رەت كەزدەستى. بالاسى 2017 جىلى دۇنيەگە كەلگەندە ول اۋستراليادا ەدى. ولار ۇزاق ۋاقىتتان كەيىن سيدنەي قالاسىندا قايتا قاۋىشتى.  

ءازىزدىڭ وتباسى قىتايمەن جۇرگىزىلگەن ديپلوماتيالىق كەلىسىم ناتيجەسىندە ەلدەن كەتۋگە رۇقسات الدى. ونىڭ ايەلى ءۇي قاماقتا بولعان. ونىڭ دا ۇلتى ۇيعىر.

وتباسى باقىتتى ءساتىن فوتوعا ءتۇسىرىپ، جەلىدە ءبولىستى. "راقمەت، اۋستراليا. بارشاڭىزعا كوپ راقمەت" دەپ جازدى ءازىز ابدۋسالام تۆيتتەردە.

ءازىز اۋستراليا ازاماتى اتانعانىنا 10 جىل. ونىڭ قالىڭدىعى قىتايدا تۇرعان. ءازىز 2016 جىلى قىتايعا ۇيلەنۋ ءۇشىن بارادى. ءبىر جىلدان كەيىن جۇمىس بابىمەن اۋسترالياعا ورالۋعا ءماجبۇر بولدى. ول ۋاقىتتا ايەلى ونىڭ ۆيزا الۋىن كۇتىپ قىتايدا قالعان. ءازىزدىڭ ايەلى سول جىلى بوساندى، ءبىراق جۇڭگو بيلىگى ازىزگە ۆيزا بەرۋدەن باس تارتتى.

ۋيمايەر حانىم بوسانعاننان كەيىن جۇڭگو بيلىگى ونى قاماۋعا الدى. ەكى اپتادان كەيىن بوساتىپ، پاسپورتىن تارتىپ الىپ، ۇيدەن شىعۋعا تىيىم سالدى. اۋستراليا قىتايدان ولاردى ەلدەن كەتۋگە رۇقسات بەرۋ تۋرالى ءوتىنىش جىبەرگەنىمەن ەكى جىل بويى جاۋاپ الا المادى.     

جۇڭگو اقپاندا زاڭدى جەلەۋ ەتىپ ءازىز بەن ۋيمايەردىڭ وتباسىن تىركەمەدى. ءازىز تۆيتتەردا بالاسى مەن ايەلىنىڭ فوتوسىن جاريالاپ، "مەن وتباسىممەن بىرگە بولعىم كەلەدى" دەپ جازدى.

اۋستراليا ديلوماتيالىق كەلىسىمنىڭ ناتيجەسىندە ۋيمايەر مەن بالاسىنا قىتايدان اۋسترالياعا كەلۋگە رۇقسات الىندى.

ءازىز ابدۋسالامۋ اۋستراليانىڭ سىرتقى ىستەر دەپارتامەنتىنە، زاڭگەرلەر مەن جۋرناليستەرگە العىسىن ءبىلدىردى.

ادام قۇقىعىن قورعايتىن ۇيىمدار ميلليونداعان ۇيعىر جۇڭگو لاگەرىندە وتىرعانىن ايتادى. جۇڭگو ادام قۇقىعى مەن بوستاندىعىن شەكتەگەنىن جوققا شىعارىپ، ونى ءدىني ەكسترەميزم مەن تەرروريزمگە قارسى كۇرەس ەكەنىن ايتادى. ونىڭ الدىن الۋ ءۇشىن "ساياسي ساۋاتتاندىرۋ" جۇمىستارىن جۇرگىزىپ جاتقانىن العا تارتتى.  

قازاندا 39 ەل جۇڭگو لاگەرلەرىندەگى جاعدايعا بايلانىستى نارازىلىقتارىن بىلدىرگەن. ونىڭ ىشىندە اۋستراليا، بريتانيا، اقش پەن بىرنەشە ەۋروپا ەلدەرى بار.