بۇگىن بۇرىنعى اۋىل شارۋاشىلىعى ۆيسە-مينيسترى رۋسلان ازيموۆ 69 جاسىندا ومىردەن ءوتتى. بۇل تۋرالى ۇلتتىق كينونى قولداۋ مەملەكەتتىك ورتالىعىنىڭ instagram پاراقشاسىندا حابارلاندى.
⠀
رۋسلان جۇماباي ۇلى بەلگىلى ءتىلشى ءارى جازۋشى جامبىل ازيموۆتىڭ وتباسىندا دۇنيەگە كەلگەن. ول الماتى اۋىل شارۋاشىلىعى ينستيتۋتىنىڭ تۇلەگى، ۆيليامس اتىنداعى ماسكەۋ عىلىمي-زەرتتەۋ ينستيتۋتىنىڭ اسپيرانتى، عىلىم كانديداتى.
"ر.ازيموۆ رەسپۋبليكاداعى العاشقى «اگرو» مەملەكەتتىك-كووپەراتيۆتىك بىرلەستىگىن قۇردى، ءوزى قۇرعان حالىقارالىق قازاقستاندىق اگروونەركاسىپتىك بيرجانىڭ پرەزيدەنتى بولدى، ق ر مەملەكەتتىك ساتىپ الۋ اگەنتتىگىن جانە «ازىق-تۇلىك كەلىسىم شارت كورپوراسياسى» ۇك» اق باسقاردى. بەيىندىك مينيسترلىكتە جۇمىس ىستەپ، قازاقستان رەسپۋبليكاسى اۋىل شارۋاشىلىعى ءمينيسترىنىڭ مىندەتىن اتقارۋشى لاۋازىمىنا دەيىن كوتەرىلدى.
"مارقۇمنىڭ باۋىرى سەرگەي جۇماباي ۇلى ازيموۆقا جانە بارلىق تۋعان-تۋىستارىنا ۇلتتىق كينونى قولداۋ مەملەكەتتىك ورتالىعى ۇجىمىنىڭ اتىنان قايعىرىپ، كوڭىل ايتامىز. قازانىڭ ارتى قايىرلى بولعاي!" دەلىنگەن حابارلامادا.
1997 جىلدىڭ سوڭىندا رۋسلان ءازىموۆ اۋىل شارۋاشىلىعى ءبىرىنشى ۆيسە-مينيسترى بولىپ تاعايىندالعان. ۋاقىتىندا اۋىل شارۋاشىلىعى ءمينيسترىنىڭ مىندەتىن اتقارۋشى لاۋازىمىنا دەيىن كوتەرىلگەن.
