قازاقستاننىڭ ىشكى ىستەر ءمينيسترى ەرلان تۇرعىمبايەۆ وزىنە قول جۇمساعان كۋرسانت وقىعان ءىىم الماتى اكادەميسىنا باردى، دەپ حابارلادى polisia.kz.

وقۋ ورنىندا كۋرسانتتىڭ قازا بولۋىنا بايلانىستى كەشەندى تەكسەرۋ جۇرگىزىلۋدە. مينيسترگە تەكسەرۋدىڭ الدىن الا ناتيجەلەرى تۋرالى ارنايى توپتىڭ باسشىسى – ءىىم كادر ساياساتى دەپارتامەنتىنىڭ باستىعى ايدار سايتبەكوۆ باياندادى. ول وقۋ ورنىنىڭ تەك قانا تۇرمىستىق جاعدايى، ماتەريالدىق-تەحنيكالىق جابدىقتالۋى عانا ەمەس، وقىتۋشىلار مەن كۋرسانتتار اراسىنداعى مورالدىق-پسيحولوگيالىق احۋال دا زەرتتەلىپ جاتقانىن اتاپ ءوتتى.

ونىڭ ايتۋىنشا، قازىرگى ۋاقىتتا جۇيەلى تۇردە زاڭسىز اقشا جيناۋ فاكتىلەرى راستالماعان. دەگەنمەن، كۋرسانتتار تۋىستارىنىڭ وقۋ ورنىنداعى ىقتيمال قىسىم كورسەتۋشىلىك تۋرالى حابارلامالارى دا مۇقيات زەرتتەلۋدە.

– ستۋدەنتتەر اراسىندا الەۋمەتتىك-پسيحولوگيالىق زەرتتەۋ جۇرگىزۋ بارىسىندا وزىنە قول جۇمساعان كۋرسانتتىڭ ءارتۇرلى سىلتاۋلارمەن تۋىستارىنان ۇنەمى اقشا سۇرايتىنى انىقتالدى. ول سونداي-اق وزگە كۋرسانتتاردان قارىزعا اقشا الىپ، ونىڭ كوپشىلىگىن قايتارماعان. كۋرسانتتاردىڭ ايتۋى بويىنشا، كۋرسانت سوڭعى كەزدە ينتەرنەت-كازينو مەن بۋكمەكەرلىك كەڭسەلەرگە سالىمدار سالۋمەن اينالىسقان. كۋرسانت سالامات وتەگەنوۆ تۋىسقاندارى مەن تانىستارىنان ءتۇرلى سومالاردى وسى ماقساتقا الىپ وتىردى ما دەگەن بولجام بار. سونىمەن قاتار، قىلمىستىق ءىستى تەرگەۋ اياسىندا بولعان وقيعانىڭ بارلىق نۇسقالارى تەكسەرىلۋدە، – دەپ باياندادى ايدار سايتبەكوۆ.

وقۋ ورنىن ارالاۋ بارىسىندا ەرلان تۇرعىمبايەۆ وقۋ ۇدەرىسىن ۇيىمداستىرۋ ماسەلەلەرىمەن، سونداي-اق كۋرسانتتاردىڭ كازارمادا تۇرۋ جاعدايىمەن تانىستى. مينيستر سونداي-اق اكادەميانىڭ وقىتۋشىلارىمەن، كۋرسانتتارىمەن جانە كۋرسانتتاردىڭ اتا-انالارىمەن كەزدەستى. ءىىم باسشىسى جاقىن ارادا جاڭا باسشىلىق تاعايىندالاتىنىن، ونىڭ باستى مىندەتى – كۋرسانتتاردىڭ ءتارتىپ دەڭگەيى مەن كاسىبي دايارلىعىن ارتتىرۋ ەكەنىن اتاپ ءوتتى.

– جوو اكىمشىلىكتەرى كۋرسانتتاردىڭ وقۋ ورنىندا بولعان كەزەڭىندەگى قاۋىپسىزدىگىن قامتاماسىز ەتۋگە مىندەتتى. ءتارتىپتى بۇزۋعا جول بەرمەي جانە ولارمەن ۇنەمى تاربيە جۇمىسىن جۇرگىزۋگە ءتيىس. بۇگىنگى تاڭدا ىشكى ىستەر ورگاندارى جوعارى ءبىلىمدى جانە كاسىبي كادرلاردى قاجەت ەتەدى. قازاقستان پوليسياسىنىڭ بولاشاعى وقۋ ورىندارىنىڭ قابىرعاسىندا الاتىن ءبىلىم مەن مورالدىق-پسيحولوگيالىق دايىندىققا بايلانىستى ەكەنىن ەستە ساقتاۋ قاجەت، – دەدى ەرلان تۇرعىمبايەۆ.

ۆەدومستۆو باسشىسى بۇل قايعىلى وقيعا تاربيە جۇمىسىنداعى پروبلەمالاردى كورسەتكەنىن ايتتى.

– ءبىز بولاشاق پوليسەيلەردى دايىنداۋ باعدارلاماسىنا وزگەرىستەر ەنگىزۋىمىز كەرەك. ۇنەمى پسيحولوگيالىق مونيتورينگ جۇرگىزۋ قاجەت، – دەپ اتاپ ءوتتى مينيستر.

ەرلان تۇرعىمبايەۆ تەرگەۋ بارىسىن جەكە باقىلاۋىنا الىپ، ناتيجەسى تۋرالى تۇراقتى بايانداۋدى تاپسىردى.

ەسكە سالساق، ءىىم بۇيرىعىمەن وزىنە سەنىپ تاپسىرىلعان بولىنىستەگى ۇيىمداستىرۋ جۇمىستارىنا ءتيىستى قاداعالاۋدىڭ بولماۋىنا بايلانىستى سكادەميا باستىعى و.ح. سمايلوۆ اتقارىپ وتىرعان لاۋازىمىنان بوساتىلدى. سونىمەن قاتار، اكادەميانىڭ تاعى 16 جاۋاپتى قىزمەتكەرى قاتاڭ تارتىپتىك جاۋاپكەرشىلىككە تارتىلدى، ولاردىڭ بەسەۋى دە لاۋازىمدارىنان بوساتىلدى.