91 جاستاعى كامال قاھارمان قىزى قازاقستان ازاماتتىعىن الدى. بۇل تۋرالى "وتانداستار قورىنىڭ" باسپا ءسوز قىزمەتى حابارلادى.

قور مالىمەتىنشە، تۋۋ تۋرالى كۋالىك پەن پاسپورتتا تەگى كورسەتىلۋى كەرەكتىگىنەن كامال قاھارمان قىزىنىڭ قۇجاتىن جاساۋدا ءبىرشاما قيىندىق تۋعان. "وتانداستار قورىنىڭ" جاردەمىمەن ماسەلە وڭ شەشىمىن تاپقان.

"عاسىرعا جۋىق جاساعان اجەمىزدىڭ العىسىن الىپ، قانداستارعا قول ۇشىن سوزعان بارلىق ازاماتتارعا العىسىمىزدى بىلدىرەمىز" دەپ حابارلادى قور قىزمەتكەرلەرى.

كامال قاھارمان قىزى 1929 جىلى قازىرگى الماتى وبلىسى الاكول اۋدانى جىلاندى اۋىلىندا تۋعان. ەل ىشىندە اۋمالى-توكپەلى زامان ورناعان كەزدە 1932 جىلى 5 جاسىندا اتا-اناسىمەن جۇڭگو حالىق رەسپۋبليكاسىنا قونىس اۋدارعان. اتا-اناسى جۇڭگو ەلىنىڭ بۇراتالا وبلىسى اراسان اۋدانىندا تۇرىپ، اۋىل شارۋشىلىعى سالاسىندا قىزمەت ىستەيدى. 1947 جىلى كامال قاھارمان قىزى تەگىسباي ىبىرايىم ۇلى ەسىمدى ازاماتقا تۇرمىسقا شىققان.

كامال قاھارمان قىزى 4 ۇل، 5 قىز، ولاردان 40-تان استام نەمەرە-شوبەرە كورگەن. تاعدىر جازۋىمەن اتاجۇرتتان الىس كەتكەن انانىڭ ارمانى – ەلگە ورالۋ بولىپتى. قازاق ەلىنە العاش رەت جولداسى تەگىسباي ىبىرايىمۇلىمەن 2004 جىلى كەلگەن. 2006 جىلى وتاعاسى ومىردەن ءوتىپ، ەلگە كەلۋىنە قيىندىق تۋادى. اراعا جىلدار سالىپ وتباسىمەن اتامەكەنىنە كوشىپ كەلەدى. باستاپقىدا قۇجات جاساتۋ جاعىنان ءبىرشاما قيىندىققا ۇشىرايدى. اقىرىندا "وتانداستار قورىنىڭ" ارالاسۋىمەن ارمانداعان ازاماتتىققا قولى جەتتى.