قازاقستاندا 2020 جىلعى 11 ايدىڭ قورىتىندىسى بويىنشا فارماسيەۆتيكالىق ونەركاسىپ ءوندىرىسىنىڭ كولەمى 39،5 پايىزعا ءوستى. وسى كورسەتكىش ارقىلى «حيمفارم» اق-نىڭ ءوندىرىسى 2 ەسە، «دولچە» ج ش س ءوندىرىسى 18 پايىزعا جانە «ابدي يبراگيم گلوبال فارم» كومپانياسىنىڭ ءوندىرىسى 62 پايىزعا وسكەنىن اڭعارۋعا بولادى، دەپ حابارلادى قازاقپارات.

ءبىرىڭعاي ديستريبيۋتور «سق-فارماسيا» كومپانياسىنىڭ كومەگىمەن كەپىلدەندىرىلگەن تەگىن مەديسينالىق دارى-دارمەكتى جەتكىزۋ مەن مەديسينالىق قۇرىلعىلارعا دەگەن سۇرانىس فارماسيەۆتيكالىق وسىمگە ىقپالىن تيگىزدى. اۋرۋحانالاردا اسا قاجەتتى دارى-دارمەكتىڭ ەكى ايلىق قورى جيناقتالدى. ازاماتتارعا كۆي بويىنشا پتر تەستىدەن ءوتۋ مۇمكىندىگى بەرىلدى، ال بۇل قىزمەتتىڭ باعاسى ەكى ەسە ارزاندادى.

بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ عالىمدارى كوروناۆيرۋسقا قارسى QazCovid-in ۆاكسيناسىن ويلاپ تاپتى. وسى ۆاكسينانىڭ العاشقى ەكى سىناعى ءساتتى ءوتتى. 2020 جىلعى 19 جەلتوقساندا ۆاكسينا سىناعىنىڭ ءۇشىنشى كەزەڭى باستالدى.

جامبىل وبلىسىنىڭ قورداي اۋدانىنىڭ اۋماعىندا كوروناۆيرۋسقا قارسى ۆاكسينا زاۋىتى سالىنىپ جاتىر. 2021 جىلعى ناۋرىز ايىندا العاشقى ۆاكسينالار دايىن بولادى. زاۋىت 30 ميلليوننان 60 ميلليونعا دەيىن ۆاكسينا ازىرلەۋگە قاۋقارلى.

سونىمەن قاتار الماتى، قىزىلوردا، قوستاناي، وسكەمەن، شىمكەنت، كوكشەتاۋ مەن باسقا دا قالالاردا 70-كە جۋىق تىگىن كاسىپورنى ماسكا تىگىپ جاتىر. بۇل كاسىپورىندار كۇنىنە 700 مىڭداي ماسكا تىگەدى.