ءماجىلىس دەپۋتاتى ساۋىتبەك ابدىراحمان ۇلى پارلامەنت ءماجىلىسىنىڭ ءتوراعاسى لاۋازىمىنا نۇرلان ءنىعماتۋليننىڭ كانديداتۋراسىن قولداۋعا شاقىردى.

– نۇرلان نىعماتۋلين بۇرىن ءماجىلىستى باسقارىپ كەلمەسە دە قولدار ەدىم. ويتكەنى ن. نىعماتۋلين قالادا دا، مينيسترلىكتە دە، وبلىستا دا، پارتيادا دا، اكىمشىلىكتە دە باسشىلىق قىزمەتتە بولىپ، ءومىردىڭ ءتۇرلى سىناعىنان ءوتتى. ەلباسى ن. نازاربايەۆتىڭ سىنانا توتەپ بەرگەن، قازاقشا ايتقاندا: وت پەن سۋدان وتكەن تۇلعا. ونىڭ ءماجىلىس ءتوراعاسى رەتىندەگى قىزمەتتە تانىتقان تالاپشىلدىعىن، ىسكەرلىگىن، جاۋاپتىلىعىن ءبىز 6-شى شاقىرىلىم كەزىندە ءوز كوزىمىزبەن كورىپ، كۇن سايىن كۋا بولدىق، – دەدى ول.

دەپۋتات ءوز سوزىندە ن.نىعماتۋلين كەز كەلگەن ماسەلەنى زەرتتەپ، سوڭىنا دەيىن جەتكىزەتىنىن اتاپ ايتتى.

– ءماجىلىس ءتوراعاسى قىزمەتىنە نۇرلان ءنىعماتۋليننىڭ كانديداتۋراسى ۇسىنىلۋى ءادىل ءارى ورىندى. مەن پارلامەنتكە سايلانعان بارلىق ارىپتەستەرىمدى، ساياسي پارتيالار فراكسياسىنىڭ مۇشەلەرىن، قازاقستان حالقى اسسامبلەياسىنان سايلانعان دەپۋتاتتاردى ن. ءنىعماتۋليننىڭ كانديداتۋراسىن قولداۋعا شاقىرامىن، – دەپ ءسوزىن تۇيىندەدى ساۋىتبەك ابدىراحمان ۇلى.

بۇگىن پارلامەنت ءماجىلىسىنىڭ جالپى وتىرىسىندا جاڭادان سايلانعان دەپۋتاتتار انت بەردى.