قازاقستاننىڭ ىشكى ىستەر ءمينيسترى ەرلان تۇرعىمبايەۆ 1 اقپاننان باستاپ "102" ءموبيلدى قوسىمشاسى ىسكە قوسىلعانىن حابارلادى. بۇل تۋرالى ول ءوزىنىڭ الەۋمەتتىك جەلىدەگى پاراقشاسىندا جازدى.
– بۇگىن "حالىق ۇنىنە قۇلاق اساتىن مەملەكەت" تۇجىرىمداماسىن ىسكە اسىرۋ اياسىندا ءبىز رەسمي تۇردە ازاماتتارعا ىڭعايلى جاڭا سەرۆيس – "102" ءموبيلدى قوسىمشاسىن ىسكە قوسامىز.
تاۋلىك سايىن پوليسيانىڭ جەدەل باسقارۋ ورتالىقتارىنىڭ وپەراتورلارى 102-ارناسىنا كەلىپ تۇسكەن 10 مىڭعا جۋىق حابارلاماعا جاۋاپ بەرەدى، – دەدى ول.
مينيستر وقىس وقيعا تۋرالى اقپارات پوليسياعا ەمەس، الەۋمەتتىك جەلىلەردە تەز تارالاتىنىن اتاپ ءوتتى.
– ادەتتە، ءارتۇرلى وقيعالاردىڭ كۋاگەرلەرى فوتوسۋرەتتەردى نەمەسە ۆيدەولاردى ءوز پاراقشالارىنا سالادى نەمەسە تانىمال پابليكتەرگە جىبەرەدى. بۇل وقيعالاردى ءبىزدىڭ ماماندار الەۋمەتتىك جەلىلەردى باقىلاۋ كەزىندە انىقتايدى. بۇل رەتتە پوليسيا قىزمەتكەرلەرى قۇقىق بۇزۋشىلىقتىڭ جولىن كەسۋ نەمەسە قىلمىستى "ءىزىن سۋىتپاي" اشۋ ءۇشىن پايدالانۋىنا قاجەت بولاتىن قىمبات ۋاقىت جوعالادى.
سوندىقتان ىشكى ىستەر مينيسترلىگىنىڭ "102" ءموبيلدى قوسىمشاسى وقيعا ورنىنان قىسقا حابارلاما، سونداي-اق فوتو، ۆيدەو جىبەرۋگە مۇمكىندىك بەرەدى.
ەگەر ءوزىڭىزدىڭ نەمەسە وزگەنىڭ قاۋىپسىزدىگىنە نەمەسە ومىرىنە ءقاۋىپ ءتونىپ تۇر دەپ ويلاساڭىز، ماس ادامنىڭ رولگە وتىرعانىن كورسەڭىز، زورلىق-زومبىلىقتىڭ كۋاسى بولساڭىز، جانۋارلارعا قاتىگەزدىك جاسالىپ جاتقانىن كورسەڭىز، كۇدىكتى ادامدى بايقاساڭىز، دەرەۋ حابارلاڭىز، – دەپ حابارلادى تۇرعىمبايەۆ.
پىكىر قالدىرۋ