الماتىدا كوروناۆيرۋسقا قارسى ەرىكتى ۆاكسينالاۋ ناۋقانى باستالدى. العاشقىلاردىڭ ءبىرى بولىپ قالانىڭ باس سانيتار دارىگەرى جانداربەك بەكشين رەسەيلىك "Sputnik V" ۆاكسيناسىن سالدىردى.

باس سانيتار دارىگەر اۋەلى دارىگەردىڭ تەكسەرۋىنەن ءوتتى. الدىن-الا ونىڭ دەنە قىزۋىن، قان قىسىمىن ولشەپ، ونكولوگيالىق اۋرۋلاردىڭ بار-جوعى انىقتادى.

– ءبىرىنشى رەت ۆاكسينا سالدىرىپ تۇرعان جوقپىن. ساپاسى دالەلدەنگەن. رەسەيدە 2 ميلليوننان استام ادام وسى ۆاكسينانى سالدىردى. مۇنىڭ ءوزى ۆاكسينانىڭ ساپالى ەكەنىن كورسەتىپ تۇر. سوندىقتان ەشقانداي قوبالجۋ جوق، ۆاكسينانىڭ ساپالى، جاقسى ەكەنىنە تولىق سەنىمدىمىن، – دەدى بەكشين.

سونداي-اق، قالا اكىمىنىڭ ورىنباسارى ەرجان باباقۇماروۆ، قوعامدىق دەنساۋلىق ساقتاۋ باسقارماسىنىڭ باستىعى ناريمان تابىنبايەۆقا دا ەكپە سالىندى.

– ۆاكسيناسيا – بۇل پاندەميامەن كۇرەستەگى شەشۋشى قادام. بۇگىن مەن ونىڭ ماڭىزدىلىعىن، قاۋىپسىزدىگىن كورسەتۋ ءۇشىن ۆاكسينانى قابىلدادىم. جاقىندا ءوزىمىزدىڭ وتاندىق ۆاكسينا ەگۋگە دايىن بولادى. ءبىز عالىمدارعا سەنەمىز. سوندىقتان مەن قالا تۇرعىندارىنا – بارلىعىنا وسى قادامدى جاساۋعا كەڭەس بەرەمىن. ۆاكسينالاۋ ءجۇرىپ جاتقان كەزدە ءبىز ماسكا تاعۋدى، الەۋمەتتىك اراقاشىقتىقتى ساقتاۋدى جالعاستىرۋىمىز جانە ۆيرۋسپەن كۇرەسۋدىڭ باسقا شارالارىن قولدانۋعا ءتيىسپىز، – دەدى ە. باباقۇماروۆ.

ەسكە سالا كەتەيىك، پرەزيدەنت قاسىم-جومارت توقايەۆتىڭ تاپسىرماسى بويىنشا بۇگىننەن باستاپ قازاقستاندا كوروناۆيرۋسقا قارسى "Sputnik V" ۆاكسيناسىن ەرىكتى تۇردە سالۋ باستالدى.