بۇگىن ۇكىمەت وتىرىسىندا ءبىلىم جانە عىلىم ءمينيسترى اسحات ايماعامبەتوۆ ساپاسىز جوعارى وقۋ ورىندارىن جابۋ جۇمىسى ارى قاراي جالعاساتىنىن ايتتى.
– جوعارى ءبىلىمنىڭ ساپاسىن ارتتىرۋ ءۇشىن پەداگوگتاردى، دارىگەرلەردى، زاڭگەرلەر مەن ساۋلەتشىلەردى دايارلايتىن ۋنيۆەرسيتەتتەرگە ەرەكشە بىلىكتىلىك تالاپتارى ەنگىزىلەدى.
بۇعان قوسا اكادەميالىق ادالدىقتى بۇزعانى جانە سىبايلاس جەمقورلىق قۇقىق بۇزۋشىلىقتارى ءۇشىن ليسەنزيادان ايىرۋعا دەيىنگى جاۋاپكەرشىلىكتى نورماتيۆتىك-قۇقىقتارعا بەكىتۋگە دايىندادىق. سونداي-اق مەملەكەتتىك باقىلاۋ جونىندەگى زاڭناماعا ليسەنزيالاۋ جانە تەكسەرۋ ءتارتىبىن وزگەرتۋ، ليسەنزيالاردى قايتارىپ الۋ ءراسىمىن ەنگىزۋ نورمالارى بويىنشا وزگەرىستەر ەنگىزەمىز. ساپاسىز جوعارى وقۋ ورىندارىن جابۋ جۇمىسىن ارى قاراي جالعاستىرامىز، – دەدى ايماعامبەتوۆ.
مينيستر كوللەدجدەرگە اكادەميالىق دەربەستىك بەرىلەتىنىن ايتتى.
– كوللەدجدەرگە اكادەميالىق دەربەستىك بەرىلەدى. اتالعان شارا ءبىلىم بەرۋ باعدارلامالارىنىڭ مازمۇنىن وزگەرتۋگە مۇمكىندىك بەرىپ، وقىتۋ مەرزىمدەرىن قىسقارتادى. ءبىلىم ساپاسىن ارتتىرىپ، ەڭبەك نارىعىنا جىلدام شىعارۋدى قامتاماسىز ەتەدى، – دەدى ول.
پىكىر قالدىرۋ