19 جاستاعى اياجان ەدىلوۆانى قاتىگەزدىكپەن ءولتىردى دەلىنگەن كۇدىكتىنىڭ جەكە باسىنا قاتىستى ءبىرقاتار تىڭ دەرەك انىقتالدى، دەپ حابارلادى استانا تەلەارناسى.
تەلەارنا مالىمەتىنشە، كۇدىكتى قازىرگى وڭتۇستىك قازاقستان مەديسينا اكادەمياسىندا ەكى جىل وقىعان. بۇرىنعى ستۋدەنتتەرىنىڭ بۇلاي تانىلۋى قىرىق جىلدىق تاريحى بار وقۋ ورنىنىڭ ۇجىمىنا دا وڭاي سوقپاعان.
فاكۋلتەت دەكانى قانات داۋرەنبەكوۆتىڭ ايتۋىنشا، راحمانبەردى تورەبەكوۆ اتالعان وقۋ ورنىنا 2012 جىلى فارماسيەۆتيكا ماماندىعىنا گرانتقا تۇسكەن. ءبىراق ەكىنشى كۋرستان سوڭ اكادەميالىق قارىزدارىنا بايلانىستى وقۋدان شىعارىلعان.
– وقۋدان شىعارىلۋىنا ساباقتارعا دۇرىس قاتىسپاعانىى سەبەپ بولعان. پاندەر بويىنشا ەمتيحان سەسسياسىنا جىبەرىلمەگەن. ال ەندى مىنەزىنە كەلەتىن بولساق، ارىپتەستەرىمىزدىڭ ايتۋىنا قاراعاندا، وتە سالماقتى بولعان. ءوزىنىڭ ارىپتەستەرىمەن، قۇربى-قۇرداستارىمەن نەمەسە وقىتۋشىلارمەن جانجالعا تۇسپەگەن، – دەدى وقۋ ورنىنىڭ دەكانى قانات داۋرەنبەكوۆ.
28 جاستاعى كۇدىكتى تۇركىستان وبلىسى شاردارا اۋدانى جاۋشىقۇم اۋىلىنىڭ تۋماسى. ول سونداعى جالپى ورتا مەكتەپتى 2010 جىلى "التىن بەلگىمەن" بىتەرگەن. كۇدىكتى راحمانبەردى تورەبەكوۆتىڭ اتا-اناسى ءمۇعالىم بولعان.
جاۋشىقۇم اۋىلى اكىمىنىڭ مالىمەتىنە ساي، كۇدىكتىنىڭ اتا-اناسى ءقازىر زەينەتتە، ءۇش پەرزەنتى بار. ەكى جىلدان استام ۋاقىت بۇرىن تۇركىستانعا قونىس اۋدارعان.
پىكىر قالدىرۋ