سايت مالىمەتىنشە، مامين توقايەۆقا بيىلعى قاڭتار-ناۋرىز ايلارىنداعى ەلدەگى الەۋمەتتىك-ەكونوميكالىق دامۋدىڭ قورىتىندىلارى جانە سانيتارلىق-ەپيدەميولوگيالىق احۋال جونىندە ەسەپ بەرگەن.
پرەمەر-مينيستردىڭ مالىمەتىنە سايكەس، اتالعان كەزەڭدە ەكونوميكانىڭ ناقتى سەكتورىندا ورنىقتى دامۋدىڭ وڭ قارقىنى بايقالادى.
"اسقار مامين قاسىم-جومارت توقايەۆقا ەلىمىزدەگى سانيتارلىق-ەپيدەميولوگيالىق احۋال جايىندا باياندادى. اۋرۋحانالارداعى جۇقپالى دەرتكە شالدىققاندارعا ارنالعان بولىمدەردىڭ – 41 پايىزىندا، جان ساقتاۋ بولىمدەردىڭ – 27 پايىزىندا ناۋقاستار ەم قابىلداپ جاتىر. ءساۋىر ايىنان باستاپ وڭىرلەردە اي سايىن 2 ميلليون ادامعا ۆاكسينا سالىنادى. قىركۇيەك ايىندا جالپى 10 ميلليون ازاماتقا ەكپە سالىنىپ، ۆاكسينالاۋ جۇمىسى اياقتالادى" دەلىنگەن حابارلامادا.
پرەمەر-مينيستردىڭ ايتۋىنشا، دەنساۋلىق ساقتاۋ جۇيەسى قاجەتتى مولشەردە دارى-دارمەكتەرمەن جانە مەديسينالىق جابدىقتارمەن تولىق قامتاماسىز ەتىلگەن. مەديسينالىق مەكەمەلەردە دارى-دارمەكتىڭ ءبىر ايلىق، ال "سق-فارماسيا" قويمالارى مەن ءدارىحانالاردا ەكى ايلىق قورى جيناقتالعان. ەلىمىزدىڭ بارلىق وڭىرىندە دارى-دارمەكتەردىڭ، قورعانىش قۇرالدارى مەن شپريستەردىڭ ءۇش ايعا جەتەتىن تۇراقتى قورى بار.
سونىمەن قاتار كەزدەسۋ بارىسىندا مەملەكەتتىك باعدارلامالاردى، قازاقستاننىڭ ەۋرازيالىق ەكونوميكالىق وداققا ءتوراعالىعىنىڭ باسىم باعىتتارىن جۇزەگە اسىرۋ جانە ينۆەستيسيا تارتۋ، ەكونوميكا سالاسىن ودان ءارى سيفرلاندىرۋ، ۇكىمەتتىڭ جۇمىسىنا وزىق سيفرلىق شەشىمدەر ەنگىزۋ، حالىقتى جۇمىسپەن قامتۋدى قولداۋ، الەۋمەتتىك ماڭىزى بار تاۋارلاردىڭ باعاسىن تۇراقتاندىرۋ جونىندە قابىلدانىپ جاتقان شارالار تۋرالى ماسەلەلەر تالقىلانعان.
پىكىر قالدىرۋ