شىعىس قازاقستان وبلىسىنداعى بالالار ءۇيىنىڭ ديرەكتورى مەن ەسەپشىسى 63 ميلليون تەڭگە جىمقىرعانى انىقتالدى. بۇل تۋرالى وبلىستىق سوت ءتوراعاسىنىڭ مىندەتىن اتقارۋشى قايرات شاقپانتايەۆ حابارلادى.  

اقشا جىمقىرۋعا قاتىستى العاشقى داۋ 2019 جىلدىڭ قاڭتارىندا باستالعان. مامانداندىرىلعان بالالار ءۇيىنىڭ 160 قىزمەتكەرى جاڭا جىل قارساڭىندا جالاقىسىز قالعان. سول ۋاقىتتا جەلىدە مەكەمەنىڭ باس ەسەپشىسى ديرەكتورمەن بىرگە 15 ميلليون تەڭگەنى جىمقىرعانى تۋرالى ۆيدەو تاراعان..

مەكەمە قىزمەتكەرلەرى وبلىستىق پروكۋراتۋرا مەن ب ا ق وكىلدەرىنەن كومەك سۇراعان سوڭ، قىلمىستىق ءىس قوزعالعان. 

– مامانداندىرىلعان بالالار ءۇيىنىڭ ەكس-ديرەكتورى، باس ەسەپشى جانە كادرلار ءبولىمىنىڭ مامانى 2015 جىلدىڭ ناۋرىزىنان باستاپ 2018 جىلدىڭ جەلتوقسانىنا دەيىن 63 ميلليون تەڭگە جىمقىردى دەگەن كۇدىككە ءىلىندى. ءقازىر قىلمىستىق كودەكستىڭ 189-بابى ("سەنiپ تاپسىرىلعان بوتەن ءمۇلiكتi يەمدەنiپ الۋ نەمەسە تالان-تاراجعا سالۋ") بويىنشا ءىس قوزعالدى. بۇل باپقا سايكەس ايىپتالۋشىلاردىڭ مۇلكى تاركىلەنىپ، 7-دەن 12 جىلعا دەيىن سوتتالۋى مۇمكىن، – دەدى شىعىس قازاقستان وبلىستىق سوتى ءتوراعاسىنىڭ مىندەتىن اتقارۋشى قايرات شاقپانتايەۆ.