پرەزيدەنت قاسىم-جومارت توقايەۆ پرەمەر-مينيستر اسقار مامين مەن دەنساۋلىق ساقتاۋ ءمينيسترى الەكسەي سويدى قابىلدادى، دەپ حابارلادى اقوردا سايتى.
ۇكىمەت مۇشەلەرى مەملەكەت باسشىسىنا ەلدەگى سانيتارلىق-ەپيدەميولوگيالىق احۋال، حالىققا ۆاكسينا سالۋ بارىسى، رەسپۋبليكانىڭ الەۋمەتتىك-ەكونوميكالىق دامۋىنىڭ وزەكتى ماسەلەلەرى جايىندا اقپارات بەردى.
سونداي-اق كەزدەسۋ بارىسىندا وتاندىق QAZVAC ۆاكسيناسىنىڭ وڭىرلەرگە جەتكىزىلۋى جانە حالىققا ەكپە ەگۋگە قاتىستى قابىلدانىپ جاتقان شارالار جايىندا ايتتى. اسقار ءماميننىڭ ايتۋىنشا، ساۋىردەن باستاپ اي سايىن 2 ميلليون ادامعا ۆاكسينا سالۋ جوسپارلانىپ وتىر.
پرەمەر-مينيستر 26 ساۋىردەن باستاپ "ASHYQ" قوسىمشاسىن بارلىق وبلىستار كەڭ كولەمدە قولدانىلا باستايتىنىن اتاپ ءوتتى. بۇل "قىزىل" جانە "سارى" ايماق كەزىندە ەكونوميكانىڭ ءارتۇرلى سەكتورىنىڭ ءقاۋىپسىز جۇمىس ىستەۋىنە مۇمكىندىك بەرمەك.
مەملەكەت باسشىسىنا بەرىلگەن اقپاراتتارعا سايكەس، جۇقپالى اۋرۋلار اۋرۋحاناسىنداعى ورىندار 42 پايىزعا، جان ساقتاۋ بولىمدەرى 28 پايىزعا تولىق. دارى-دارمەكتىڭ، جەكە قورعانىس قۇرالدارىنىڭ قاجەتتى قورى جاساقتالعان، پتر-زەرتحانالارى كۇنىنە 123 مىڭ ادامعا دەيىن قىزمەت كورسەتە الادى. 25 مىڭ توسەك-ورىن قورى بار، بارلىق وڭىردە زاماناۋي قۇرالدارمەن جابدىقتالعان جاڭا جۇقپالى اۋرۋلار اۋرۋحانالارى جۇمىس ىستەپ تۇر.
كەزدەسۋ سوڭىندا پرەزيدەنت ۇكىمەتكە وتاندىق ۆاكسينا ءوندىرىسىن ارتتىرۋدى جانە ونىڭ حالىققا قول جەتىمدى بولۋىن ەرەكشە باقىلاۋدا ۇستاۋدى تاپسىردى.
پىكىر قالدىرۋ