بۇگىن جەر رەفورماسى جونىندەگى كوميسسيانىڭ وتىرىسىندا جەر يەلىگىنە قاتىستى نورمالارعا بەلگىلەنگەن موراتوريي مەرزىمىن 5 جىلعا ۇزارتۋ تۋرالى شەشىم قابىلداندى.

– اۋىل شارۋاشىلىعى جەرلەرىنىڭ ەلەكتروندى فورماتتا كوپشىلىككە اشىق تۇردە بەرۋ تەتىگىن ەنگىزۋ قاجەت. ونى وتكەن سەنبىدە بىرگە تالقىلادىق. از دەگەندە 2023 جىلعا دەيىن ۋاقىت كەرەك. ونى دا قاراستىرۋ كەرەك. سوندىقتان بارشا ازامات جەر يەلىككە نەمەسە پايدالانۋعا بەرۋدىڭ ادىلەتتى جانە اشىق وتەتىندىگىنە كوز جەتكىزۋ قاجەت. وتكەن اپتادا وسى جەردە كەرەمەت، تاريحي شەشىم قابىلداندى دەپ ويلايمىن. جەردى جالعا 49 جىلعا بەرۋگە بايلانىستى شەشىم قابىلداندى. ونىڭ ءوزى جەردىڭ قازىرگى ەكونوميكالىق اينالىمعا ەنۋىنە تولىقتاي مۇمكىندىك تۋعىزىپ جاتىر. مەنشىككە بايلانىستى "بولادى نە بولمايدى" دەپ شەشىم قابىلداماي، ونى بولاشاققا قالدىرۋ كەرەك دەپ ويلايمىن، –  دەدى وتىرىس بارىسىندا ق ر پرەمەر-مينيسترىنىڭ ورىنباسارى ەرالى توعجانوۆ.

ونىڭ ايتۋىنشا، جەردى مەنشىككە بەرۋگە قاتىستى شەشىمدى بولاشاققا قالدىرۋدىڭ ءبىر-اق جولى بار.

– اۋىل حالقى بولاشاقتا وسى ماسەلەگە قاتىستى تىكەلەي شەشىم قابىلداۋى كەرەك شىعار. پارلامەنتتە ءبىراز ماسەلە كوتەرىلەتىندىگى ايتىلدى. سونىڭ ءبارىن بولاشاقتا ەسكەرە وتىرىپ، وسى ىسكە از دەگەندە 3 جىلدان 5 جىلعا دەيىن ۋاقىت كەرەك دەگەن ويدا وتىرمىن. اسىعىستىق جاساۋعا بولمايدى. ولاي بولسا، جەر يەلگىنە قاتىستى نورمالارعا جىل سوڭىنا دەيىن بەلگىلەنگەن موراتوريي مەرزىمىن 5 جىلعا ۇزارتۋدى ۇسىنامىز. ءبىر عانا شەشىم بولۋى كەرەك قوي دەپ ويلايمىن. ءقازىر بىرنەشە شەشىم قابىلداۋعا، ەلدى جان-جاققا تارتۋعا ەش قاقىمىز جوق. وسى جەردەگى ءاربىر ازامات جاۋاپكەرشىلىكتى موينىنا الىپ وتىر دەپ ويلايمىن. سوندىقتان، كوميسسيا مۇشەلەرى وسىنداي ورتاق پىكىرگە توقتالساق دەگەن ۇسىنىستى ورتاعا سالامىن، – دەدى ەرالى توعجانوۆ.

كوميسسيا مۇشەلەرى جەر يەلىگىنە قاتىستى نورمالارعا جىل سوڭىنا دەيىن بەلگىلەنگەن موراتوريي مەرزىمىن 5 جىلعا ۇزارتۋدى قولداپ داۋىس بەردى.

دەرەككوز: inform.kz