ءماجىلىس وتىرىسىندا پالاتا سپيكەرى نۇرلان نىعماتۋلين دەنساۋلىق ساقتاۋ ءمينيسترى الەكسەي سويدان تۇرعىندار مەن جۋرناليستەردىڭ ۆاكسيناسيا تۋرالى سۇراقتارىنا ناقتى جاۋاپ بەرۋىن سۇرادى.

نۇرلان نىعماتۋلين الەكسەي سويدان ۆاكسينانىڭ ەكى كومپونەنتىمەن ۆاكسيناسيالانعان ادامدار سانى بويىنشا سۇرادى.

– جۋرناليستەرمەن كەزدەسكەندە حالىققا قولدا بار ناقتى سانداردى  ايتىڭىز. ال مىناۋ ەكۆيليبريستيكا ءبارىن شاتاستىردى. ءسىز ەكىنشى دوزا 21 كۇننەن كەيىن ەگىلەدى دەدىڭىز. ال كەي ورىنباسارلارىڭىزدىڭ ءبىرى 90 كۇن دەيدى. ال ءقازىر ءسىز ەڭ كوپ دەگەندە 45 كۇن دەپ وتىرسىز. ءبارىن شاتاستىرىپ جىبەردىڭىز!  ءبىز حالىقارالىق ستاندارت اياسىندا جىلجىپ كەلەمىز. سوندىقتان تىم بولماسا ۆاكسيناسيانى دۇرىس ۇيىمداستىرىڭىزدار. ءبىر اقپارات شىقسا، ال كەيىن باسقا قىزمەتكەرىڭىز باسقاسىن ايتادى. جۇرتتىڭ باسىن قاتىرمايىق. ەگەر دە ەكى دوزا بولسا، ەكەۋىن دە سالدىرۋ قاجەت. 15 كۇننەن كەيىن انتيدەنەلەر قالىپتاسادى دەگەن – اقتالۋ الەكسەي ۆلاديميروۆيچ. ەكى دوزانى العان ادام عانا ۆاكسينالانعان بولىپ سانالادى. مىنە، سولاردى ەسەپتەۋ كەرەك – دەدى نىعماتۋلين.

بۇعان دەيىن مينيستر ەلگە 2،3 ملن دوزا ۆاكسينا جەتكىزىلگەنىن، 1،4 ملن ادامعا ۆاكسينانىڭ ءبىرىنشى كومپونەنتى ەگىلگەنىن حابارلاعان. بۇگىندە ۆاكسينانىڭ ەكىنشى كومپونەنتىن 347 مىڭ ادام سالدىردى. 

دەنساۋلىق ساقتاۋ ءمينيسترى الەكسەي سوي كوروناۆيرۋسقا قارسى ۆاكسينا ازاماتتارعا ەرىكتى تۇردە سالىناتىنىن جانە ۆاكسيناسيا جەتكىلىكتى قارقىنمەن ءجۇرىپ جاتقانىن جەتكىزدى.

– ۆاكسينانسيانىڭ ەكىنشى كومپونەنتى 21 جانە ەڭ كوبى 45 كۇننەن كەيىن  سالىنادى. ءبىرىنشى كومپونەنتتى سالدىرعاننان كەيىن انتيدەنەلەر 15 كۇندە پايدا بولاتىنىن ءتۇسىنۋ قاجەت. جەتكىزۋدىڭ ناقتى كەستەلەرى بار. ءبىز وڭىرلەرمەن جۇمىس ىستەيمىز. كەشە 117 مىڭ ادام ۆاكسينا سالدىردى. تۇرعىندار كوپتەگەن تانىسى ۆاكسينا سالدىرىپ جاتقانىن كورىپ، ەشقانداي دا اسقىنۋ جوعىن بايقاۋدا. ازاماتتاردىڭ بەلسەندىلىگى ارتىپ كەلە جاتقانىن بايقاپ وتىرمىز، – دەپ جاۋاپ بەردى سوي.