بەلسەندى، حالىقارالىق شولۋشى قۋانىش ەدىلحانتەگى ءوزىنىڭ Facebook پاراقشاسىندا جۇڭگو بيلىگىنىڭ شىڭجاڭداعى ەتنيكالىق قازاقتارعا كورسەتىپ وتىرعان قىسىمىنا جاۋاپ رەتىندە ازاماتتىق قوعامدى 2022 جىلى بەيجىڭدە وتەتىن قىسقى وليمپيادا ويىندارىنا بويكوت جاريالاۋعا شاقىردى.
شولۋشى "اقش مەملەكەتتىك دەپارتامەنتىنىڭ باسشىسى ەنتوني بلينكەن الداعى وليمپيادا ويىندارىنا اقش بويكوت جاريالاۋى مۇمكىن ەكەنىن ايتۋى قازاقستانعا بەرىلگەن ىم، يشارا ىسپەتتەس" دەگەن پىكىردە.
"بىرىنشىدەن، سونداي جوعارى دەڭگەيدەگى باسشى جايدان-جاي ىم جاسامايدى، ول ونىڭ ستاتۋسىنا ساي ەمەس جانە سپورت ساياساتتان تىس دەگەن حالىقارالىق جازىلماعان زاڭدى ەلەمەۋشىلىك بولىپ تابىلادى. ەندەشە ونداي ويدى مەملەكەت باسشىلارى ەمەس، ازاماتتىق قوعام وكىلدەرى كوتەرگەنى قيسىندى بولماق.
ەكىنشىدەن، جۇڭگو ەكسپانسياسىنان شىن قورلىق كورىپ وتىرعان قاي ەل؟ شىڭجاڭداعى قازاقتاردى گەنوسيدكە ۇشىراتىپ وتىرعان جۇڭگو ساياساتىنان جاپا شەگىپ وتىرعان ءبىزدىڭ ەل ەمەس پە؟ جۇڭگو ەلشىلىگىنىڭ الدىندا نەشەمە كۇندەردەن بەرى ادامدارىن بوساتۋدى سۇراپ زارلاعان انالاردىڭ داۋسىن ەستي تۇرا ەلشىلىكتەن ءبىر ادام شىعىپ جاۋاپ بەرمەۋىن قالاي تۇسىنۋگە بولادى؟ بۇل تەك استامشىلىق قانا ەمەس، ءتىپتى ەشقانداي مورالعا سىيمايتىن، ادامگەرشىلىكتەن جۇرداي، ناعىز يتتىك قوي؟ سوعان شىداپ ءۇن قاتپاي وتىرعان ءبىزدىڭ مەملەكەتتى قازاققا جاناشىر مەملەكەت دەۋگە كىمنىڭ اۋزى بارادى؟ تالاي قورلىقتى قازاقپەن بىردەي كورىپ كەلە جاتقان ۇيعىردا ءتىپتى مەملەكەت تە جوق. ەندەشە بىزدەر، ازاماتتىق قوعام وكىلدەرى، نەگە وسى ماسەلەنى كوتەرمەيمىز؟ ينيسياتيۆا تومەننەن باستالعانى دۇرىس ەمەس پە؟" دەگەن ول بەيجىڭدە وتكەلى وتىرعان قىسقى وليمپيادا ويىندارىنا بويكوت جاريالاۋعا ۇندەدى.
بەلسەندى "مۇنى (بويكوتتى - رەد.) اقش قولداسا، باسقالارى دا قوسىلادى دەپ ويلايمىن، بۇل قىتايعا ابىروي اكەلە قويماس. ەڭ بولماعاندا ءوشىمىزدى سولاي الساق؟ ءبارىبىر باسقاشا قولىمىزدان نە كەلەدى؟" دەيدى.
قۋانىش ەدىلحانتەگى وسى وليمپيادانى وتكىزۋگە 2014 جىلى الماتى مەن بەيجىڭ داۋىسقا ءتۇسىپ، جۇڭگو استاناسى ءتورت داۋىسپەن جەڭىپ شىققانىن، پولشا، ۋكراينا، نورۆەگيا، شۆەسيا سەكىلدى وزگە كانديداتتار قارجىلىق شىعىندى ەسكەرىپ، ۇمىتكەرلىگىن قايتىپ العانىن ايتادى. ال شۆەيساريا، يسپانيا، گەرمانيا ەلدەرى رەفەرەندۋم وتكىزىپ، حالقى قارسى شىققان سوڭ كانديداتۋرالارىنان باس تارتقان.
بەلسەندى اقتىق كەزەڭگە دەيىن بارعان ەكى اۆتوريتارلىق ەل ۇكىمەتىنىڭ ويىنا رەفەرەندۋم وتكىزىپ، حالقىنان سۇراۋ كەلمەگەنىنە اشىنادى.
"ءتىپتى باسقالار ولاردى ادەيى ارانداتىپ، ارتىنان جورتا جارىس جولىنان شىعىپ قالدى ما، كىم ءبىلىپتى؟ قالاي بولعاندا دا ءبىزدى قۇداي ساقتاپتى، ايتپەسە ناعىز كوررۋپسيانىڭ كوكەسى، اقشا جەۋ وسى كەزدەردە ءجۇرىپ جاتار ەدى" دەيدى شولۋشى.
وقي وتىرىڭىز:
پىكىر قالدىرۋ