"دەباتتار" جوباسىنا دا بارلىق ءبىلىم بەرۋ ۇيىمىندا باسا ءمان بەرىلۋى ءتيىس. بۇل تۋرالى دەبات ويىندارىنىڭ بەلسەندى قاتىسۋشىلارىمەن كەزدەسۋدە ءبىلىم جانە عىلىم ءمينيسترى اسحات ايماعامبەتوۆ ايتتى.
"ۆەدومستۆو باسشىسى اسحات ايماعامبەتوۆ ەلىمىزدە وقۋشىلار مەن ستۋدەنتتەر اراسىنداعى دەبات قوزعالىسى قايتا جاندانىپ جاتقانىن جانە دەباتتار مەكتەپ، كوللەدج، جوعارى وقۋ ورىندارىنداعى تاربيە جۇمىسىنىڭ اجىراماس بولىگىنە اينالاتىنىن اتاپ ءوتتى. كەزدەسۋگە رەسپۋبليكانىڭ بارلىق اۋدانى مەن قالاسىنان دەبات ۇيلەستىرۋشىلەرى، ءبىلىم باسقارمالارىنىڭ باسشىلارى، جوعارى وقۋ ورىندارىنىڭ پرورەكتورلارى، مەكتەپ جانە ستۋدەنتتىك دەبات كلۋبتارىنىڭ بەلسەندى دەباتەرلەرى شاقىرىلدى" دەلىنگەن حابارلامادا.
دەباتتى ويىن رەتىندە ەمەس، ءبىلىم بەرۋ تەحنولوگياسى دەپ قابىلداۋىمىز قاجەت. سوندىقتان بۇل قوزعالىستى بەلسەندى تۇردە دامىتىپ جاتىرمىز. ءبىز قازاقستاندا دەبات قوزعالىسىن دامىتۋ تۇجىرىمداماسىن جانە وقۋشىلار مەن ستۋدەنتتەر اراسىندا دەبات تۋرنيرلەرىن وتكىزۋ قاعيدالارىن ازىرلەدىك. مينيسترلىكتىڭ "وقۋعا قۇشتار مەكتەپ"، "مەكتەپتەگى جانە ستۋدەنتتىك ءوزىن-وزى باسقارۋ" سياقتى جوبالارىمەن بىرگە "دەباتتار" جوباسىنا دا بارلىق ءبىلىم بەرۋ ۇيىمىندا باسا ءمان بەرىلۋى ءتيىس، – دەدى ايماعامبەتوۆ.
سونداي-اق مينيستر ستۋدەنتتىك جىلدارى ءوزى دە دەبات ويىندارىنا بەلسەندى قاتىسقانىن ايتىپ ءوتتى.
-دەبات ادام بويىندا ماڭىزدى داعدىلاردى قالىپتاستىرادى. ماسەلەن، بۇل تاجىريبە ماعان كوپ پايداسىن تيگىزدى جانە ءقازىر جۇمىس بارىسىندا دا كومەكتەسەدى. سوندىقتان بالالاردىڭ سىني ويلاۋ قابىلەتىن دامىتۋ، كوماندادا جۇمىس ىستەۋگە باۋلۋ، سۇراقتارعا جاۋاپ بەرۋ، ءوز پىكىرىڭدى دالەلدەۋ، بالالاردىڭ ءوز ويلارىن دۇرىس تۇجىرىمداۋى ءۇشىن بىزگە وسى ءبىلىم بەرۋ تەحنولوگياسىن بەلسەندى قولدانۋ قاجەت، – دەدى ول.
سونىمەن قاتار اسحات ايماعامبەتوۆ دەبات قوزعالىسىنىڭ دامۋى قاعاز جۇزىندە بولماۋى ءتيىس ەكەنىن اتاپ ءوتتى. وسى رەتتە بالانىڭ قىزىعۋشىلىعىن تۋعىزىپ، وعان جەكە قاسيەتتەرىن دامىتۋعا كومەكتەسۋ ماڭىزدى.
دەبات تۋرنيرلەرىنىڭ جەڭىمپازدارى جوعارى وقۋ ورىندارى رەكتورلارىنىڭ گرانتتارىن الا الادى.
