قوعام بەلسەندىسى مۇحتار تايجان قازاقستاندا قىمباتشىلىق ورشۋىنە بايلانىستى پرەزيدەنت ق. توقايەۆقا ۇندەۋ جولدادى.
– اۋىل شارۋاشىلىعىنا ارنالعان اۋماعى وتە ۇلكەن ەل قازاقستاندا ءسابىزدىڭ قۇنى 735 تەڭگەگە جەتىپ، 1،5 دوللار قۇراپ وتىر. جانە بۇل – مەملەكەتتىك سۋبسيديالار جىلدار بويى قۇيىلىپ جاتىرعان سالاداعى جاعداي. جايىلىم جوقتىعىنان مال اشتان ءولىپ، كوتەرەم بولىپ، قوقىس، كارتون جەپ جاتىر. جانە بۇنىڭ ءبارى مىڭ جىلدار بويى مال باققان كونە كوشپەندىلەر ەلىندە ورىن الىپ وتىر.
بۇل سوڭعى جىلدارداعى ەكونوميكالىق ساياساتتىڭ قانشالىقتى سوراقى ەكەنىنەن شىنايى دا تۋرا حابار بەرەتىن كورسەتكىش. بابالارىمىزدان مۇرا بولىپ قالعان، كەلەشەك ۇرپاققا تيەسىلى ۇلتتىق قورىمىز سارقىلۋعا جاقىن تۇر. وتكەن جىلى سول جىلى تۇسكەننىڭ 96 پايىزى جۇمسالىپ كەتتى.
ەندى ۇكىمەت ازىق-تۇلىك باعاسىن اكىمشىلىك جولمەن رەتتەگىسى كەلەدى. وندا مەملەكەتتىك جوسپار جۇيەسىن ەنگىزىپ، بارشا ەكونوميكانى مەملەكەت مەنشىگىنە وتكىزىڭىزدەر! بۇل – ادامنىڭ كۇلكىسىن كەلتىرەتىن: "پويىز، توقتا، بىر-ەكى!" دەگەن انەكدوت قوي. نارىقتىق ەكونوميكادا باعانى – بۇيرىق، جارلىقتارمەن ەمەس، ۇسىنىستى كوبەيتۋ ارقىلى تۇسىرەتىنىن ەستىمەپ پە ەدىڭىز؟، – دەدى قوعام بەلسەندىسى.
بەلسەندى ەكونوميكالىق داعدارىستى ەڭسەرۋ ءۇشىن ۇكىمەتكە بارۋعا ءازىر ەكەنىن تاعى جەتكىزدى. ول بۇعان دەيىن دە داعدارىستى جەڭۋ ءۇشىن بيلىككە بارعىسى كەلەتىنىن ءمالىم ەتكەن.
– ەكونوميكامىزدىڭ بارشا سالاسىن تۇرالاتىپ، جوعارىدا باياندالعان كۇيسىز ناتيجەگە جەتكىزگەن كلاندار مەن وليگارحتىق توپتارمەن بايلانىس-شاتىسى جوق ادامدار ۇكىمەتكە كىرۋى ءتيىس ەكەنىنە بەك سەنەمىن. ءوز باسىم حالىق الدىندا جاۋاپكەرشىلىك ارقالاپ، ەلىمىزدى ەكونوميكالىق داعدارىستان شىعارۋعا ءازىرمىن، – دەپ جازادى مۇحتار تايجان facebook پاراقشاسىندا.
