2021 جىلدىڭ قورىتىندىسى بويىنشا قازاقستاندىقتاردىڭ ناقتى تابىسى 5 پايىزعا ارتادى. بۇل تۋرالى پرەمەر-مينيستر اسقار مامين پارلامەنت پالاتالارىنىڭ بىرلەسكەن وتىرىسىندا مالىمدەدى.

ۇكىمەت باسشىسىنىڭ ايتۋىنشا، جىل سوڭىنا دەيىن 1،2 ملن حالىق جۇمىسپەن قامتىلادى. 

– 2021 جىلدىڭ قورىتىندىسى بويىنشا ۇكىمەت الدىندا ەكونوميكا ءوسىمىن 3،5-4،0% دەڭگەيىندە قامتاماسىز ەتۋ جانە 1،2 ملن ادامدى جۇمىسپەن قامتۋ شارالارىن ىسكە اسىرۋ مىندەتى تۇر. بۇل حالىقتىڭ ناقتى تابىسىن 5%-عا ارتتىرۋعا مۇمكىندىك بەرەدى،– دەدى مامين. 

سونىمەن قاتار ۇكىمەت الدىندا 8 ترلن تەڭگەگە 415 ينۆەستيسيالىق جوبانى ىسكە اسىرۋ، 17 ملن شارشى مەتر تۇرعىن ءۇي پايدالانۋعا بەرۋ، 200 مەكتەپ سالۋ جانە 30 مەدپۋنكت اشۋ، 6 مىڭ شاقىرىم اۆتوجول سالۋ جانە جوندەۋ،  قالاداعى حالىقتى اۋىز سۋمەن 98 پايىزعا جانە اۋىلدى 91،8 پايىزعا قامتاماسىز ەتۋ جوسپارى تۇر.

– اگروونەركاسىپ كەشەنىنىڭ الەۋەتىن پايدالانۋ ءۇشىن 1050 شاقىرىم كانالدى جوندەۋ جوسپارلانىپ وتىر، بۇل سۋارىلاتىن جەرلەردى 78 مىڭ گەكتارعا ۇلعايتۋعا مۇمكىندىك بەرەدى، – دەپ اتاپ ءوتتى پرەمەر-مينيستر.