قازاقستاننىڭ دەنساۋلىق ساقتاۋ مينيسترلىگى ەل اۋماعىندا ءۇندى شتاممىنىڭ تارالۋ ىقتيمالدىعىن انىقتادى. بۇل تۋرالى مينيسترلىكتىڭ رەسمي سايتى حابارلادى.
مينيسترلىك مالىمەتىنشە، نۇر-سۇلتان قالاسىندا كوروناۆيرۋس جۇقتىرۋ دەڭگەيىنىڭ كۇرت وسۋىنە بايلانىستى ناۋقاستاردان الىنعان وڭ زەرتحانالىق ۇلگىلەردىڭ پتر سكرينينگى وتكىزىلگەن.
"سكرينينگ ناتيجەلەرى بويىنشا "دەلتا" شتامىنا ("ۇندىلىك" شتامم) ءتان مۋتاسياعا كۇدىكتى جاعداي انىقتالدى. مۋتاسيانىڭ بولۋىن جانە ونىڭ "دەلتا" شتامىنا جاتاتىندىعىن تۇپكىلىكتى راستاۋ دنق ۇلگىلەرىن تولىق گەنومدىق سەكۆەنيرلەۋ اياقتالعاننان كەيىن بەلگىلى بولادى" دەلىنگەن حابارلامادا.
مينيسترلىك دەرەگىنشە، "دەلتا" كوروناۆيرۋس شتامى اسا كونتاگيوزدى جانە انىقتالعان شتامدارعا قاراعاندا جۇقپالىلىعى 60%-عا جوعارى، قازىرگى اينالىمداعى شتامدار 1 ادامنان ورتا ەسەپپەن 3-4 ادامعا تارالاتىن بولسا، بۇل شتامم 5-6 ادامعا بىردەن جۇعادى جانە 7 كۇنگە سوزىلاتىن قىسقا ينكۋباسيالىق كەزەڭمەن سيپاتتالادى.
"ىندەتتى جۇقتىرعاندار بۋىندار مەن ءىشتىڭ قاتتى اۋىرسىنۋىن سەزىنەدى، جۇرەك اينىپ، لوقسيدى، اۋرۋ سالدارىنان ادام ساڭىراۋ بولىپ قالۋى ابدەن مۇمكىن جانە اياقتاردىڭ ميكروترومبوزىنا اكەلەدى. سوڭعى زەرتتەۋلەر كورسەتكەندەي، كوروناۆيرۋستىڭ "ۇندىلىك" شتامى اۋرۋحاناعا جاتقىزۋ مەن ءولىم-جىتىمنىڭ جوعارى ىقتيمالدىعىمەن بايلانىستى" دەلىنگەن حابارلامادا.
دۇنيەجۇزىلىك دەنساۋلىق ساقتاۋ ۇيىمىنىڭ 2021 جىلعى 20 ماۋسىمداعى مالىمەتتەرى بويىنشا SARS-CoV-2 "دەلتا شتامم" الەمنىڭ 174 ەلىندە انىقتالعان.
پىكىر قالدىرۋ