تۇركىستان وبلىسىنىڭ تولە بي اۋدانىنا قاراستى "سايرام-وگەم" شاتقالىندا جوعالعان تاعى ءبىر ءتۋريستىڭ ءمايىتى تابىلدى، دەپ حابارلادى وبلىستىق توتەنشە جاعدايلار دەپارتامەنتىنىڭ باسپا ءسوز قىزمەتى.
ۆەدومستۆونىڭ مالىمەتىنە ساي، 22 ماۋسىم ساعات 11.50-دە شىمكەنت قالاسى توتەنشە جاعدايلار دەپارتامەنتى جەدەل-قۇتقارۋ جاساعىنىڭ قۇتقارۋشىلارى ءمايىتتى ايعىرجىققان جانە وگەم وزەندەرىنىڭ توعىسقان جەرىنەن ەكى شاقىرىم جوعارىدا سۋ تۇبىنەن تاپقان.
مۇردەنى تاسىمالداۋ ءۇشىن "قازاۆياقۇتقارۋ" تىكۇشاعى وقيعا ورنىنا بارا جاتقانى، ساراپتاما جاساۋ ءۇشىن ءمايىت پوليسياعا تاپسىرىلاتىنى حابارلاندى.
"جوعالعان تۋريستەردى ىزدەستىرۋ جۇمىستارى 8 باعىت بويىنشا جۇرگىزىلدى. وعان 107 ادام، 17 بىرلىك تەحنيكا، 3 كۆادروكوپتەر، 4 كينولوگيالىق ەسەپ پەن 1 تىكۇشاق جۇمىلدىرىلدى" دەلىنگەن حابارلامادا.
ەسكە سالا كەتەيىك، 25 مامىر كۇنى ساعات 18:30-دا "112" پۋلتىنە تۇركىستان وبلىسىندا تاۋدا 7 ءتۋريستىڭ جوعالىپ كەتكەنى تۋرالى حابارلاما كەلىپ تۇسكەن. 3 تۋريست وتباسىمەن امان-ەسەن قاۋىشسا، 3 ادامنىڭ دەنەسى تابىلعان.
پىكىر قالدىرۋ