ەلوردا اكىمى التاي كولگىنوۆ نۇر-سۇلتان كوروناۆيرۋسقا شالدىعۋشى ناۋقاستار سانى ازايماي تۇرعانىن ايتتى.

اكىم تۇرعىنداردى ۆاكسيناسيادان وتۋگە شىقىرىپ، جۇقتىرۋ كورسەتكىشى ازايماسا، لوكداۋنعا قايتا ورالۋعا تۋرا كەلەتىنىن ءمالىم ەتتى.

– سانيتارلىق دارىگەرلەر كارانتيندىك شارالاردى قاتاڭداتۋ تۋرالى جاڭا قاۋلى دايىنداۋدا. تاۋەكەل توبىنداعى ازاماتتارعا مىندەتتى تۇردە ۆاكسينا الۋدى ۇسىنامىز. بۇل توپقا پەداگوگتار، مەديسينا قىزمەتكەرلەرى، الەۋمەتتىك قىزمەتكەرلەر، مەكتەپ، بالاباقشا، ۋنيۆەرسيتەت قىزمەتكەرلەرى، قىزمەت كورسەتۋ سالالارى، ياعني حالىققا قىزمەت كورسەتۋ ورتالىعى، بانكتەر، شاشتارازدار، سۇلۋلىق سالوندارى، تالاپكەرلەر (18 جاسقا تولعان)، سونداي-اق قالانىڭ تىنىس-تىرشىلىگىن قامتاماسىز ەتەتىن قىزمەتكەرلەر جاتادى.

قالا تۇرعىندارىمەن تىكەلەي بايلانىستا بولاتىن جانە جۇمىس ىستەيتىن قىزمەتكەرلەر ءتۇسىنۋى كەرەك. ەڭ الدىمەن ءوزىن جانە اينالاسىنداعى ادامداردى قورعاۋى قاجەت. مىسالى، قوعامدىق تاماقتانۋ ورىندارى، مەيرامحانالار نەمەسە ساۋدا ويىن ساۋىق ورتالىقتارىندا بوتەن ادامدارمەن تىكەلەي بايلانىساتىن بولساڭىز، ەڭ الدىمەن ۆاكسيناسيادان ءوتىپ، ءوزىڭىزدى جانە اينالاڭىزداعى جۇرتتى قورعاۋىڭىز كەرەك. ەگەر اتالعان ۇيىم قىزمەتكەرلەرى ۆاكسيناسيالانباسا، نىساننىڭ جۇمىسى توقتاتىلادى، – دەدى ا.كولگىنوۆ.