بۇگىن بەينەكونفەرەنسيا فورماتىندا ۇقشۇ پارلامەنتتىك اسسامبلەياسىنىڭ وتىرىسى ءوتىپ، وندا قازاقستان پرەزيدەنتى قاسىم-جومارت كەمەل ۇلى توقايەۆتىڭ بىتىمگەرشىلىك ماسەلەلەرى بويىنشا ۇقشۇ باس حاتشىسى ارنايى وكىلىنىڭ ينستيتۋتىن قۇرۋ تۋرالى باستاماسى تالقىلاندى، دەپ حابارلادى ءماجىلىستىڭ باسپا ءسوز قىزمەتى.
وتىرىستا ءسوز سويلەگەن ءماجىلىس ءتوراعاسى نۇرلان نىعماتۋلين اتاپ وتكەندەي، قازاقستان جاھاندىق جانە ايماقتىق دەڭگەيدەگى وزەكتى ماسەلەلەردى شەشۋ ءۇشىن حالىقارالىق ءوزارا ءىس-قيمىلدى ودان ءارى تەرەڭدەتۋگە جانە نىعايتۋعا نيەتتى. سەبەبى قازىرگى ۋاقىتتا ايماقتىق قاۋىپسىزدىك تاقىرىبىنىڭ وزەكتىلىگى بۇرىنعىدان دا ارتا تۇسكەن.
ءماجىلىس سپيكەرى سونداي-اق ۇقشۇ ۇيىمىنىڭ بىتىمگەرشىلىك الەۋەتىن دامىتۋدىڭ ماڭىزىنا دا باسا نازار اۋداردى. وسى رەتتە قازاقستان پرەزيدەنتى قاسىم-جومارت كەمەل ۇلى توقايەۆتىڭ بىتىمگەرشىلىك ماسەلەلەرى بويىنشا ۇقشۇ باس حاتشىسى ارنايى وكىلىنىڭ ينستيتۋتىن قۇرۋ تۋرالى باستاماسىن جۇزەگە اسىرۋ ۇيىمنىڭ بۇۇ-عا ءتيىستى قۇرىلىمدارىمەن ءوزارا ءىس-قيمىل مۇمكىندىگىن كەڭەيتەتىندىگىن العا تارتا كەلە نۇرلان نىعماتۋلين وسى سالاداعى وزەكتى سۇراقتاردى جاڭا ساپالىق دەڭگەيدە شەشۋگە، سونىمەن بىرگە، بۇۇ بىتىمگەرشىلىك الەۋەتىن ارتتىرۋعا جول اشاتىنىنا سەنىم ءبىلدىردى.
وتىرىستا سونداي-اق تاجىكستاننىڭ 2021 جىلى ۇقشۇ ءتوراعالىعى، ۇقشۇ اياسىندا قول جەتكىزىلگەن ۇقشۇ ارىپتەستىك مارتەبەسىنە، قازاقستاندا، ارمەنيادا، قىرعىزستاندا وتكەن سايلاۋلاردا ءۇقشۇ پا اتىنان قاتىسقان حالىقارالىق بايقاۋشىلار توبى جۇمىستارىنىڭ قورىتىندىسىنا قاتىستى حالىقارالىق كەلىسىمدەر توڭىرەگىندە اڭگىمە ءوربىدى.
ۇقشۇ پا كەڭەسى اسسامبلەيا قىزمەتىن ۇيىمداستىرادى، ونىڭ قۇرامىندا قازاقستان، ارمەنيا، بەلارۋس، قىرعىزستان، رەسەي جانە تاجىكستان ەلدەرى پارلامەنتتەرىنىڭ باسشىلارى بار.
پىكىر قالدىرۋ