پرەزيدەنت قاسىم-جومارت توقايەۆ مۇسىلمان جاماعاتىن قۇربان ايت مەيرامىمەن قۇتتىقتادى، دەپ حابارلادى اقوردانىڭ رەسمي سايتى.
– بۇل – قايىرىمدىلىق پەن جاناشىرلىق، ىزگىلىك پەن يماندىلىق سياقتى اسىل قاسيەتتەردى دارىپتەيتىن ۇلىق مەيرام.
سالت-داستۇرىمىزبەن بەرىك ۇشتاسقان اتا ءدىنىمىز – ەلدىڭ رۋحاني تۇتاستىعىن ساقتاۋعا ىقپال ەتەتىن باستى قۇندىلىقتىڭ ءبىرى، – دەدى مەملەكەت باسشىسى.
توقايەۆ ءوز سوزىندە قۇربان ايت قاشاندا بارشا جۇرتتى بەرەكە-بىرلىككە ۇندەيتىنىن بۇكىل حالىقتىڭ ىرىس-ىنتىماعىن ارتتىراتىنىن اتاپ ءوتتى.
– مۇسىلمان بالاسى بۇل كۇندەرى وتباسى اماندىعى مەن ەل تىنىشتىعى ءۇشىن قۇرباندىق شالىپ، جوق-جىتىككە كومەكتەسەدى، مۇقتاج جاندارعا قامقورلىق تانىتادى. وسىنداي ىزگى نيەت پەن ساۋاپتى ءىس ەل-جۇرتتىڭ بىر-بىرىمەن ەتەنە ارالاسۋىنا، ءوزارا سىيلاستىق پەن جاقسىلىققا جول اشادى.
قۇربان ايتتىڭ ۇلاعاتى مەن ونەگەسى ءبىزدىڭ رۋحاني قۇندىلىقتارىمىزبەن ۇندەسەدى. بۇگىنگى مەرەكەنىڭ ءمان-ماڭىزى وسىندا دەپ بىلەمىن.
شالعان قۇرباندىقتارىڭىز، دۇعا-تىلەكتەرىڭىز قابىل بولسىن، – دەپ ءسوزىن تۇيىندەدى پرەزيدەنت.
پىكىر قالدىرۋ