جامبىل وبلىسىنىڭ اكىمى بەردىبەك ساپاربايەۆ ەلدە ءوتىپ جاتقان ميتينگتەرگە قاتىستى كوزقاراسىن ءبىلدىردى. بۇل تۋرالى ول جۋرناليست نارتاي ارالباي ۇلىنىڭ YouTube-كانالىنا بەرگەن سۇحبات بارىسىندا ايتتى.

– جالپى دەموكراتيالى مەملەكەت بولعاننان كەيىن دەموكراتيا بولۋ كەرەك. ءبىراق ميتينگتىڭ دە ميتينگى بولۋ ءتيىس. مىسالى ءقازىر ۆاكسيناعا قارسى ميتينگ ۇيىمداستىرىپ جاتىر. مەنىڭ ويىمشا بۇل دۇرىس ەمەس. دۇنيەجۇزى دەنساۋلىق ساقتاۋ ۇيىمى ۆاكسينا الماساق ىندەتتەن قۇتىلا المايتىنىمىزدى ايتتى. سوندا "قازاقستان" بولەك مەملەكەت پە؟! ونىڭ ۇستىنە ءبىزدىڭ ەلگە كەلۋشىلەر دە بار، ءوزىمىز دە باسقا مەملەكەتتەرگە بارامىز. ەگەر ءبىز ءبىر جاققا بارىپ، ءورىسىمىزدى كەڭەيتەمىز دەسەك – ەكپەدەن ءوتىپ، بالا-شاعامىزدى ۇيرەتۋىمىز كەرەك، – دەدى وبلىس اكىمى.

ساپاربايەۆ بىلتىرعى كوروناۆيرۋستان بولعان ءولىم-جىتىم قازاقستاندىقتارعا ساباق بولۋى كەرەگىن اتاپ ءوتتى.

– بىزدە الەۋمەتتىك جەلىلەر ارقىلى ەكپەگە قارسىلىق ءبىلدىرىپ، ميتينگكە شىعۋعا شاقىرادى. كەشە عانا "بالالاردىڭ ەكپە الۋىنا قارسىمىز" دەپ جازىپ جىبەرىپتى. 18 جاسقا دەيىنگى بالالار ەكپە المايدى. ەكپە سالۋعا ەشكىمدى ماجبۇرلەمەيدى. ءبىراق اۋىرىپ قالسا ول قايدا بارادى؟! ارينە، اۋىرعاننان كەيىن ول مەملەكەتكە كەلەدى. كەيىن ءوزىنىڭ ەكپەدەن باس تارتقانىن ۇمىتىپ كەتەدى. ونىڭ زيانى بالا-شاعاسىنا، اعايىنا، دوستارىنا تيەدى.

مەنىڭ ويىمشا مەملەكەت قاراماي، ماسەلەنى شەشپەي جاتسا، ميتينگكە شىعۋ كەرەك. ميتينگتىڭ ءوزىنىڭ مادەنيەتى بولۋى قاجەت. ءبىز اۋەسقوي، ەلىكتەگىش حالىقپىز. ماسەلەن امەريكا، ەۋروپاعا قاراپ، سولاي جاساۋ كەرەك دەپ ويلايمىز. ول كەزدە ەشتەڭە دە بولمايدى. بىزدە زاڭدا ميتينگتىڭ قالاي ءوتۋ كەرەكتىگى جازىلعان، – دەدى بەردىبەك ساپاربايەۆ.