الماتى قالاسىنىڭ سانيتارلىق-ەپيدەميولوگيالىق باقىلاۋ دەپارتامەنتى "قىزىل" مارتەبەسى بار ايىپپۇل سالىنعان تۇرعىنداردىڭ ءتىزىمىن جاريالادى.
"قىزىل ستاتۋسى" انىقتالعان 80 تۇرعىنعا 14 كۇندىك ءۇي كارانتينىن بۇزعانى ءۇشىن 30 اەك كولەمىندە ايىپپۇل سالىنعان، ونىڭ ىشىندە 2 تۇرعىنعا ەكى رەت ايىپپۇل سالىنعان.
COVID-19-عا تاپسىرعان پتر تەستى وڭ ناتيجە كورسەتكەن الماتىلىقتار قوعامدىق ورىندارعا بارىپ، "ASHYQ" بويىنشا جۇمىس ىستەيتىن نىساندار (حقكو، مەيرامحانا، فيتنەس-ورتالىقتار، اۋەجاي) قىزمەتتەرىن پايدالانۋعا تىرىسقان. "قىزىل ستاتۋسى" انىقتالعان اتالعان تۇرعىندار "ASHYQ" جوباسى بويىنشا جۇمىس ىستەيتىن وبەكتىلەرگە جىبەرىلمەدى.
"سوندىقتان امبۋلاتوريالىق ەمدەلىپ جاتقان قالا تۇرعىندارىن ءوزىن-وزى وقشاۋلاۋ رەجيمىن بۇزباۋعا جانە قوعام الدىندا ازاماتتىق جاۋاپكەرشىلىك تانىتۋعا شاقىرامىز. ۆيرۋس جۇقتىرعان ادامدارمەن بايلانىستا بولعان تۇلعالار ءوزىن-وزى وقشاۋلاۋ رەجيمىن ساقتاۋى جانە باسقا ادامدارعا جۇقتىرماس ءۇشىن ادام كوپ جينالاتىن ورىندارعا بارماۋى كەرەك" دەلىنگەن مالىمدەمەسىندە.
الماتى قالاسىنىڭ اۋداندارى بويىنشا "قىزىل ستاتۋسى" بار، 14 كۇندىك ءۇي كارانتينىن بۇزىپ جانە 30 اەك مولشەرىندە ايىپپۇلعا تارتىلعان تۇرعىندار ءتىزىمىن مىنا جەردەن كورۋگە بولادى.
پىكىر قالدىرۋ