يۋنيسەف-تىڭ زەرتتەۋىنشە، قازاقستاندا 1 ملن-عا جۋىق بالا كەدەيشىلىكتە ءومىر سۇرەدى. ەلدەگى 340 مىڭنان استام كوپبالالى وتباسىنىڭ بارلىعى بىردەي جاقسى ءومىر سۇرمەيدى. بۇعان "كوپبالالى وتباسى" دەگەننىڭ جانە "از قامتىلعان وتباسى" دەگەن ۇعىمنىڭ سينونيمىنە اينالىپ بارا جاتقانى دالەل، دەپ حابارلادى inbusiness.kz.

"قازاقستانداعى كەدەي وتباسىلاردىڭ 90%-دان استامى كوپبالالى وتباسىلار. مۇنداي وتباسىلاردىڭ بالالارى كەدەيلىك شەگىنەن تومەن تۇراتىن بارلىق قازاقستاندىقتاردىڭ 40%-دان استامىن قۇرايدى. كەدەيلىك بالانىڭ دۇرىس تاماقتانباۋىنا، دەنساۋلىعىنىڭ ناشارلاۋىنا جانە ءومىر ءسۇرۋ ۇزاقتىعىنىڭ قىسقارۋىنا اسەر ەتەدى" دەپ جازىلدى يۋنيسەف-تىڭ زەرتتەۋىندە.

ەلدە بالالارعا ارنالعان تۇتىنۋ قورجىنى جوق. جاردەماقى مەن الەۋمەتتىك تولەمنىڭ مولشەرى تومەن. مىسالى، جۇمىس ىستەمەيتىن ايەلدەر ءۇشىن بالا كۇتىمى بويىنشا اي سايىنعى جاردەماقى مولشەرى ءبىرىنشى بالاعا – 5،76 اەك (16 801،92 تەڭگە)، ەكىنشى بالاعا – 6،81 اەك (19 864،77 تەڭگە)، ءۇشىنشى بالاعا – 7،85 اەك، (22 898،45 تەڭگە). ايەل ادامنىڭ دەكرەتتىك دەمالىسى 3 جىلعا دەيىن سوزىلاتىنىنا قاراماستان، بالا كۇتىمى بويىنشا اي سايىنعى جاردەماقى بالا 1 جاسقا تولعانعا دەيىن عانا تولەنەدى. ال تابىسىنان ايىرىلۋىنا بايلانىستى جۇكتىلىك جانە بوسانۋ بويىنشا الەۋمەتتىك تولەم تەك جۇمىس ىستەيتىن ايەلدەرگە عانا تاعايىندالادى.