شىعىس قازاقستان وبلىسىندا اتا-اناسى كوروناۆيرۋسقا قارسى ەكپە سالدىرماعان بالالار بالاباقشاعا كىرمەيدى دەگەن قاۋەسەت تارادى. دەنساۋلىق ساقتاۋ مينيسترلىگى بۇل اقپاراتتى جوققا شىعاردى.
ەلدىڭ جانە وبلىستىڭ باس سانيتار دارىگەرلەرى مۇنداي تالاپتاردىڭ قاۋلىدا جازىلماعانىن اتاپ ءوتتى.
"باس مەملەكەتتىك سانيتار دارىگەردىڭ 14 شىلدەدەگى قاۋلىسىندا مەكتەپكە دەيىنگى مەكەمەلەرگە باراتىن بۇلدىرشىندەردىڭ اتا-انالارىن ۆاكسيناسيالاۋ تۋرالى ماسەلە قوزعالمايدى. بالالار بالاباقشالارعا ەش شەكتەۋسىز بارادى" دەلىنگەن مينيسترلىك تاراتقان حابارلامادا.
باس سانيتار دارىگەر ەرلان قياسوۆتىڭ قاۋلىسىنا سايكەس، سوڭعى 3 اي ىشىندە تۇراقتى مەديسينالىق قارسى كورسەتىلىمدەرى بار نەمەسە COVID-19 ينفەكسياسىمەن اۋىرعانداردى قوسپاعاندا، ۆيرۋسقا ۆاكسينا الماعان ادامدار كۇندىزگى بولىمدە جۇمىس ىستەۋگە جىبەرىلمەيدى.
بۇل تالاپ ءبىلىم بەرۋ جانە تاربيەلەۋ ۇيىمدارىنىڭ قىزمەتكەرلەرىنە دە قاتىستى. الايدا اتالعان ءبىلىم بەرۋ مەكەمەلەرىنە باراتىن بالالارعا جانە اتا-انالارىنا ۆاكسيناسيا تۋرالى تالاپتار قولدانىلمايدى.
پىكىر قالدىرۋ