وڭتۇستىك ءوڭىرىنىڭ تۇرعىندارىن سولتۇستىككە قونىستاندىرۋ ماسەلەلەرى بويىنشا ونلاين دوڭگەلەك ۇستەل ءوتتى. شىمكەنت قوعامدىق كەڭەستىڭ مۇشەسى رۋستەم اشەتايەۆ پەن «SHANYRAQ» وتباسى ينستيتۋتىن قولداۋ ورتالىعىنىڭ ۇيىمداستىرۋىمەن وتكەن شارادا ZOOM ارقىلى قالا تۇرعىندارى سولتۇستىك قازاقستان وبلىسىنىڭ جۇمىسپەن قامتۋ ورتالىعىنىڭ ماماندارىمەن تىلدەسە الدى. مەملەكەتتىك باعدارلامانىڭ تيىمدىلىگى مەن تالاپتارى قالا تۇرعىندارىنا كەڭىنەن ءتۇسىندىرىلدى.

اتالعان باعدارلامانىڭ ماقساتى - وڭتۇستىكتەن قونىس اۋدارۋشىلاردى جۇمىسپەن قامتۋ. ءوڭىر وكىلدەرىنىڭ ايتۋىنشا، قازىرگى تاڭدا سولتۇستىك وڭىردە بىلىكتى دارىگەرلەر مەن مۇعالىمدەر سۇرانىسقا يە.

بيىل وڭتۇستىكتەن قونىس اۋدارعان ءار وتباسى مۇشەسىنە بەرىلەتىن سۋبسيديا مولشەرى - 70 اەك. ياعني، 204 مىڭ تەڭگە قاراجات كوشىپ جايعاسۋ ءۇشىن كومەك رەتىندە بەرىلەدى.

ايتا كەتسەك، 2020-2021 جىلى شىمكەنت قالاسى بويىنشا 67 وتباسى قونىس اۋدارۋعا نيەت بىلدىرگەن. جالپى وتكەن جىلى وڭتۇستىكتەن قونىس اۋدارعان وتباسىلاردىڭ باسىم بولىگى اۋىلشارۋشىلىعى مەن مال شارۋاشىلىعى كاسىبىمەن اينالىسىپ، كاسىپتەرىن دامىتىپ وتىر.
سولتۇستىككە قونىس اۋدارۋ ماسەلەسى بويىنشا بايدىبەك بي داڭعىلى، 32 ا عيماراتى، «SHANYRAQ» وتباسى ينستيتۋتىن قولداۋ ورتالىعىنان قوسىمشا اقپارات الۋعا بولادى.