جامبىل وبلىسىنداعى جارىلىستان قازا تاپقاندار سانى 14 ادامعا جەتتى. بۇل تۋرالى توتەنشە جاعدايلار مينيسترلىگى حابارلادى.

“قورعانىس مينيسترلىگىنىڭ ساپەرلەرى وقيعا ورنىنان تاعى ءبىر ادامنىڭ دەنەسىن تاپتى. ونىڭ كىم ەكەنى انىقتالىپ جاتىر" دەپ جازىلعان حابارلامادا.

وسىلايشا، جامبىل وبلىسىنداعى اسكەري قويماداعى جارىلىستان قازا تاپقاندار سانى 14-كە جەتتى. جوعالعان 2 ادام ىزدەستىرىلۋدە.

26 تامىز كۇنى جامبىل وبلىسى بايزاق اۋدانىندا ورنالاسقان اسكەري بولىمدە ساعات 19.00 شاماسىندا قويمالاردىڭ ءبىرىنىڭ جانىندا ءورت شىققان. ءورت سالدارىنان قويماداعى ءوق-دارى جارىلىپ، سالدارىنان 14 ادام قازا تاپقان. ولاردىڭ اراسىندا ءورت سوندىرۋشىلەر، توتەنشە جاعداي مينيسترلىگىنىڭ، اسكەري ءبولىمنىڭ، اسكەري كۇزەت پەن اسكەري پروكۋراتۋرانىڭ قىزمەتكەرلەرى بار. اسكەري بولىمنەن جارتى شاقىرىم جەردەگى قاينار اۋىلىنداعى ۇيلەر بۇلىنگەن.