الماتى قالاسى ناۋرىزباي اۋدانىندا ءتورت جولاقتى جول اشىلدى. بۇل تۋرالى الماتى اكىمى باقىتجان ساعىنتايەۆ ءوزىنىڭ instagram پاراقشاسىندا حابارلادى.

"جولدى جاقسارتۋ بويىنشا اۋقىمدى جۇمىس جالعاسۋدا – جاڭا جول سالىپ، بار جولدى جوندەپ، ۇزارتۋدامىز. جاقىندا الاتاۋ كوشەسىنىڭ سابدەنوۆ كوشەسىنەن رايىمبەك داڭعىلىنا دەيىنگى 2 شاقىرىمدىق ۋچاسكەسى اشىلدى. ءتورت جولاقتى جول ناۋرىزباي اۋدانىنىڭ اكىمشىلىك ورتالىعىن قالانىڭ ءىرى ماگيسترالىمەن بايلانىستىردى. اباي داڭعىلىن تەسۋ اياقتالعان سوڭ قالا ورتالىعىمەن كولىك قاتىناسى ەداۋىر جاقسارادى. "جاڭا الماتىنى" دامىتۋدىڭ كەشەندى جوسپارى اياسىندا الاتاۋ، تۇركسىب پەن ناۋرىزباي اۋداندارىنا قاراستى سەگىز ىقش.-داعى 415 كوشەدە 108 شاقىرىم جول سالىنۋدا. 153 مىڭنان استام تۇرعىننىڭ موبيلدىلىگى مەن جايلىلىعى ارتادى. سونداي-اق بيىل مەدەۋ اۋدانىنداعى دۋمان ىقش.-نىڭ 59 كوشەسىندە، ياعني 30،5 كم جولدىڭ كۇردەلى جوندەۋ جۇمىسى اياقتالادى" دەلىنگەن اكىم جازباسىندا.