شىمكەنت قالاسىنىڭ وڭدەۋ ونەركاسىبىندەگى نەگىزگى كاپيتالعا سالىنعان ينۆەستيسيا كولەمى بيىلعى 9 ايدا 55،4 ملرد تەڭگەنى قۇراپ، وتكەن جىلدىڭ ءتيىستى كەزەڭىمەن سالىستىرعاندا 2،1 ەسەگە ارتتى.

بۇل تۋرالى شىمكەنت قالاسىنىڭ كاسىپكەرلىك، يندۋستريالدى-يننوۆاسيالىق دامۋ باسقارماسىنىڭ باسشىسى ب.دۇيسەبەكوۆ 2021 جىلدىڭ 9 ايىندا اتقارىلعان جۇمىستاردى قورىتىندىلاۋ ەسەبىندە مالىمدەدى.
باسقارما باسشىسى وڭدەۋ ونەركاسىبىنىڭ دامۋى، ينۆەستيسيا تارتۋ، كاسىپكەرلىكتى قولداۋ شارالارىنىڭ بارىسىنا توقتالىپ ءوتتى.

شىمكەنت – ەلىمىزدەگى ءىرى ونەركاسىپتىك ورتالىقتارىنىڭ ءبىرى. ونەركاسىپ ءونىمىنىڭ كولەمى 2021 جىلدىڭ قاڭتار-قىركۇيەك ايلارىندا 555،8 ملرد تەڭگەگە جەتىپ، 2020 جىلدىڭ ءتيىستى كەزەڭىمەن سالىستىرعاندا 6،5 پايىزعا ارتقان. بۇل كورسەتكىش بويىنشا شىمكەنت قالاسى 7 ورىندا. جىل سوڭىنا دەيىن ونەركاسىپ ءونىمىنىڭ كولەمى 710،0 ملرد تەڭگەگە جەتەدى دەپ بولجانۋدا.

ال وڭدەۋ ونەركاسىبىندە جيھاز ءوندىرۋ (157،5 %)، حيميا ونەركاسىبى (157،5 %)، ماشينا جاساۋ (150،9 %)، دايىن مەتالل بۇيىمدارىن ءوندىرۋ (128،4 %)، نەگىزگى فارماسيەۆتيكالىق ونىمدەر (114،6 %)، سۋسىنداردى ءوندىرۋ (111،1 %)، جەڭىل ونەركاسىپ (102،1 %)، مۇناي وڭدەۋ ونىمدەرىن ءوندىرۋ (103،0%) سالالارىندا ءونىم كولەمى ارتقان. جىل سوڭىنا دەيىن وڭدەۋ ونەركاسىبى ءونىمىنىڭ كولەمى 628،0 ملرد تەڭگەنى قۇراپ، 2020 جىلمەن سالىستىرعاندا 102،0 پايىز بولادى دەپ بولجانۋدا.

قالا اكىمى م. ايتەنوۆ شاھار ەكونوميكاسىنداعى يمپورت ونىمدەرىن وزىمىزدە شىعارۋدىڭ جوباسىن دايىنداپ، ينۆەستورلار تارتۋدى قاراستىرۋ قاجەت ەكەنىن اتاپ ءوتتى. بۇل ورايدا شىمكەنت قالاسىنىڭ وزىنە ءتان دامۋ باعدارىن انىقتاۋ قاجەت. قالا اكىمى ەندىگى رەتتە بۇكىل ەلدىڭ دامۋىنا وزىندىك ىقپالىن تيگىزەتىن وندىرىستەردى كۇشەيتۋدى تاپسىردى.