بۇگىن ەلورداداعى «كازمەديا» ورتالىعىندا «WorldSkills Kazakhstan – 2021» ۇلتتىق چەمپيوناتىنىڭ اشىلۋ سالتاناتى ءوتتى. ۇلتتىق چەمپيوناتقا ەلىمىزدىڭ بارلىق وڭىرلەرىنەن قاتىسۋشى كوللەدج ستۋدەنتتەرىنىڭ 600-گە جۋىعى قاتىستى.

چەمپيونات قازاقستاننىڭ 8 ءوڭىرىنىڭ ءوندىرىس الاڭدارىندا 1 اي كولەمىندە وتكىزىلمەك. جالپى، ۇلتتىق چەمپيونات رەسپۋبليكا اۋماعىندا وسىمەن التىنشى رەت وتۋدە.

WorldSkills – ءوز ءىسىنىڭ ۇزدىكتەرىن انىقتايتىن، جۇمىسشى كاسىبىنىڭ مارتەبەسىن ارتتىرىپ، كاسىبيلىكتى ناسيحاتتايتىن جاحاندىق جوبا.
قازاقستان رەسپۋبليكاسىنىڭ ءبىلىم جانە عىلىم ءمينيسترى ا.ايماعامبەتوۆ چەمپيوناتتىڭ اشىلۋ سالتاناتىندا ءسوز سويلەپ، شارانىڭ حالىقارالىق ستاندارتتار نەگىزىندە تەحنيكالىق ماماندىقتار بويىنشا ءوندىرىس ورىندارى سالاسىن جوعارى تەحنولوگيانى جەتىك مەڭگەرگەن جاس ماماندارمەن قامتاماسىز ەتۋدە ماڭىزى زور ەكەنىن اتاپ ءوتتى.

سونداي-اق، باس ۇستاز تەحنيكالىق جانە كاسىپتىك ءبىلىم جۇيەسىندەگى يندۋستريالدى-يننوۆاسيالىق دامۋ تالاپتارىنا سايكەس جۇزەگە اسىرىلىپ جاتقان جوبالار اياسىندا جۇمىسشى ماماندارىن دايارلاۋدىڭ ينفراقۇرىلىمىن دامىتۋ، «جاس مامان» جوباسى بويىنشا وقۋ باعدارلامالارىن قايتا قاراپ، مودەرنيزاسيالاۋ، كادرلاردى ەڭبەك نارىعىنا سايكەستەندىرۋ ماسەلەلەرىنە توقتالىپ ءوتتى.

شىمكەنت قالاسىنان چەمپيوناتقا جولداما العان، 32 قۇزىرەتتىلىك بويىنشا 33 قاتىسۋشى-ستۋدەنتتەر قالانىڭ نامىسىن قورعايتىن بولادى.