ىشكى ىستەر ءمينيسترى ەرلان تۇرعىمبايەۆ ءماجىلىس وتىرىسىندا الداعى ۋاقىتتا پوليسيا قىزمەتكەرلەرىنىڭ جالاقىسى كوتەرىلەتىنىن ايتتى.

مينيستر بۇگىندە پوليسەيلەردىڭ جالاقىسى قۇقىق قورعاۋ ورگاندارى اراسىندا وتە تومەن ەكەنىن اتاپ ءوتىپ، جالاقى 2019 جىلدان باستاپ كەزەڭ-كەزەڭمەن ءوسىپ كەلە جاتقانىن جەتكىزدى.

– 2023 جىلعا دەيىن ءبىز قىزمەتكەرلەردىڭ جالاقىسىن 50%-دان 90%-عا دەيىن كوتەرەتىن بولامىز. ماسەلەن، سەرجانتتىڭ جالاقىسى 81 مىڭنان 101 مىڭ تەڭگەگە دەيىن، لەيتەنانتتىڭ جالاقىسى 130 مىڭنان 174 مىڭ تەڭگەگە دەيىن وسەدى، – دەدى ەرلان تۇرعىمبايەۆ ماجىلىستەگى ۇكىمەت ساعاتى كەزىندە.

سونىمەن قاتار مينيستر پوليسەيلەردىڭ اسكەريلەر سياقتى باسپانا الۋعا مۇمكىندىگى بار ەكەنىن مالىمدەدى. تۇرعىن ءۇي تولەمدەرى بانك ارقىلى قىزمەتكەردىڭ جەكە باسپاناسىنا جۇمسالادى.

ايتۋىنشا، مۇنداي جەڭىلدىكپەن قىزمەتكەرلەردىڭ 72%-ى قامتىلعان.

سونداي-اق قىزمەتتىك مىندەتىن اتقارۋ كەزىندە قازا تاپقان جانە جاراقات العان قىزمەتكەرلەردىڭ وتباسىسىنا تۇرعىن ءۇي تولەمى ساقتالادى.