بۇگىن ءال-فارابي اتىنداعى قالالىق عىلىمي-امبەباپ كىتاپحاناسىندا «شىمكەنت قالاسىنىڭ ەنسيكلوپەدياسى» قامتيتىن مالىمەتتەردى سارالاۋ جيىنى ءوتتى. باسقوسۋعا شىمكەنت قالالىق ءماسليحاتىنىڭ حاتشىسى ب.نارىمبەتوۆ، جازۋشى م.ابداكىم ۇلى جانە زيالى قاۋىم وكىلدەرى قاتىستى.

— ءاربىر رەسپۋبليكالىق ماڭىزى بار قالانىڭ تاريحىن، ونداعى تۇلعالار مەن تاريحي-تانىمدىق مالىمەتتەردى توپتاستىرىپ، ءبۇتىن ءبىر ەنسيكلوپەديا ەتىپ شىعارۋ وتە دۇرىس باستاما. ءبىز بۇل ەنسيكلوپەدياعا قالانىڭ تاريحىن، شىمكەنتتى باسقارعان جانە ءتۇرلى سالادا ەڭبەك ەتكەن تانىمال تۇلعالاردى، عالىمداردى، ونەر ادامدارىن جانە وزگە دە قۇندى دەرەكتەردى ەنگىزۋدى جوسپارلاپ وتىرمىز، – دەدى ب.نارىمبەتوۆ.
ءماسليحات حاتشىسىنىڭ ايتۋىنشا، ەنسيكلوپەديا قالا اكىمدىگىنىڭ قارجىلاندىرۋىمەن مامىر ايىنىڭ سوڭىندا جارىق كورمەك. ال، كىتاپتىڭ تۇساۋكەسەرى قالا كۇنىنە جوسپارلانىپ وتىر.

ەنسيكلوپەديانى قۇراستىرۋشى رەداكتور، جازۋشى م. ابداكىم ۇلى جيىن بارىسىندا ۇيىمداستىرۋ جانە رەداكسيا القاسىمەن تانىستىرىپ ءوتتى. اقىلداستار القاسىنا شىمكەنت قالاسى اكىمى م. ايتەنوۆتەن باستاپ، قالاداعى باسقارما، مۋزەي، ارحيۆ جانە مادەنيەت وشاقتارىنىڭ باسشىلارى كىرگەن. ال رەداكسيا القاسىندا وسى جۇمىستى ۇيلەستىرىپ، توپتاستىراتىن جۋرناليستەر مەن عالىمدار بار.

— بارشاعا بەلگىلى جىل باسىندا «شىمكەنت قالاسىنىڭ تاريحى» جارىق كورگەن-دى. ەندى ەنسيكلوپەديانى قۇراستىرۋعا كىرىسىپ كەتتىك. جوسپار بويىنشا ەنسيكلوپەديا قالا تاريحىنان باستالادى. تاريحتى كەزەڭ-كەزەڭىمەن بەرگەن سوڭ، وزگە مالىمەتتەر الفاۆيتتىك نەگىزدە ۇسىنىلماق. قالا تاريحى، ونى باسقارعان تۇلعالاردىڭ قىسقاشا ءومىربايانى، عالىمدار، سوسياليستىك ەڭبەك ەرلەرى، ونەر ادامدارى، ءوندىرىس ورىندارى، مادەني وشاقتار، بارلىعىن قامتۋدى كوزدەپ وتىرمىز. ءتىپتى، قالانىڭ وركەندەۋىنە ۇلەس قوسقان قۇرمەتتى ازاماتتاردىڭ ءتىزىمىن ەنگىزەتىن بولامىز، – دەدى م. ابداكىم ۇلى.

جيىن بارىسىندا ۇيىمداستىرۋ القاسىنىڭ مۇشەلەرى ءوز سالالارىنا قاتىستى وي-پىكىرلەرىن ايتىپ، ۇسىنىستارىن ورتاعا سالدى.

زاميرا الدابەرگەنوۆا