بۇگىن الماتى قالاسىنداعى «استانا الاڭىندا الماتى وبلىسى اۋىل شارۋاشىلىعى تاۋار وندىرۋشىلەرىنىڭ جارمەڭكەسى ءوتتى. وندا ءوڭىردىڭ 17 اۋدانى مەن 3 قالاسىنان جەتكىزىلگەن ازىق-تۇلىك ساۋدالاندى. جارمەڭكەدە جالپى قۇنى 174،8 ميلليون تەڭگە بولاتىن 455 توننا كولەمىندە اۋىلشارۋاشىلىق ءونىمى ۇسىنىلدى، دەپ حابارلادى الماتى وبلىسى اكىمىنىڭ باسپا ءسوز قىزمەتى.

قالالىقتار ءۇشىن 36،0 توننا ەت، 21،0 توننا ءسۇت ونىمدەرى، 114،7 توننا كوكونىس پەن 38،0 توننا جەمىس-جيدەك، 15،8 توننا بالىق، 38 توننا كارتوپ جانە باسقا دا تاۋارلار ساۋداعا شىعارىلدى. جارمەڭكەدەگى ازىق-تۇلىك باعاسى قالا بازارىنان 10-15 پايىزعا ارزان ءارى ساپالى.

- ەڭبەكشىقازاق اۋدانى شەلەك اۋىلىندا تۇرامىن. 8 گەكتار الما باعىم بار. جىل سايىن وتەتىن ءداستۇرلى جارمەڭكەنى ساعىنىپ قالىپپىز. ساۋدامىز ويداعىداي جۇرۋدە، - دەيدى جارمەڭكەگە ارنايى كەلگەن تايىر قالداياقوۆ. سونداي-اق، ساۋدا سورەلەرىندە تەكەلى ءسۇت زاۋىتىنىڭ ونىمدەرىنە، ەسكەلدى اۋدانىنىڭ بالىنا، ەڭبەكشىقازاق اۋدانىنىڭ الماسىنا، نارىنقولدىڭ كارتوبىنا، باقاناستىڭ كۇرىشىنە، كوكسۋ مەن اقسۋدىڭ ەت ونىمدەرىنە، باسقا دا تابيعي تازا ونىمدەرگە دەگەن سۇرانىس وتە جوعارى بولدى. 

جارمەڭكەنىڭ ءوتۋ بارىسىن وبلىس اكىمىنىڭ ورىنباسارى سەرىك تۇردالييەۆ باستاعان جۇمىس توبى قاداعالاپ، ساۋدانىڭ قالاي ءجۇرىپ جاتقانىن كورىپ، اۋىلدان كەلگەن شارۋا قوجالىقتارىنىڭ جەتەكشىلەرىمەن پىكىرلەستى.