ءبىلىم جانە عىلىم ءمينيسترى اسحات ايماعامبەتوۆ سەنات وتىرىسىندا مەكتەپتەردە بالالار ەرتەڭگىلىگىن وتكىزۋگە قاتىستى سۇراققا جاۋاپ بەردى.
اسحات ايماعامبەتوۆتىڭ ايتۋىنشا، بۇكىل ءبىلىم جۇيەسى باس مەملەكەتتىك سانيتار دارىگەردىڭ شەشىمىنە باعىنادى.
– ەرتەڭگىلىكتەر مەن باسقا دا بۇقارالىق ءىس-شارالارعا كەلەتىن بولساق6 ولار مەكتەپتەردە وتكىزىلمەيدى. باس سانيتار دارىگەردىڭ شەشىمى بار، ءبىز بۇل شەشىمدەرگە باعىنامىز. سوندىقتان مەكتەپتەردە ەرتەڭگىلىكتەر نەمەسە باسقا دا بۇقارالىق ءىس-شارالار بولمايدى. مەرەكەلەردى ءبىر سىنىپ ىشىندە وتكىزۋ تۋرالى شەشىم مەكتەپ اكىمشىلىگى دەڭگەيىندە قابىلدانادى، – دەپ جاۋاپ بەردى ۆەدومستۆو باسشىسى سەنات وتىرىسىندا.
سونداي-اق، مينيسترگە "وميكرون" شتامىنىڭ تارالۋىنا بايلانىستى مەكتەپ وقۋشىلارىن قاشىقتان وقىتۋ فورماتىنا كوشىرۋ مۇمكىندىگى تۋرالى سۇراق قويىلدى.
– بۇل تۋرالى ايتۋعا ءالى ەرتە، ءبىز ۆەدومستۆوارالىق كوميسسيانىڭ شەشىمدەرى اياسىندا جۇمىس ىستەيمىز. قازىرگى ۋاقىتتا قورىتىندى شىعارۋعا اقپارات جەتكىلىكسىز، – دەپ ءتۇسىندىردى مينيستر.
پىكىر قالدىرۋ