ەلدە مۇگەدەك ادامدارعا تولەنەتىن مەملەكەتتىك جاردەماقىنى ەكى ەسەگە ارتتىرۋ ماسەلەسىن كوتەرگەن پەتيسياعا قول جيناۋ ءجۇرىپ جاتىر. Egov.press سايتىندا جاريالانعان پەتيسيادا ۇكىمەت تاراپىنان مۇگەدەكتەرگە تيىسىنشە كوڭىل بولىنبەيتىنى ايتىلادى.

پەتيسيا اۆتورى رانيتا جۇماشيەۆانىڭ سوزىنشە، قازاقستاندا مۇمكىندىگى شەكتەۋلى 700 مىڭداي ادام بار، ولار جالدامالى تۇرعىن ءۇي تولەمىنە جۇمسالاتىن بولماشى جاردەماقىعا ءومىر سۇرەدى.

"ءبىز، قازاقستاندىق مۇگەدەكتەر، بۇل تولەمدەردى ادىلەتسىز دەپ سانايمىز، ويتكەنى كوپشىلىگىمىز ءبىر ۋاقىتتا ەڭبەك ەتىپ، قوعامعا پايدا اكەلدىك. ءبىراق مۇگەدەك بولىپ قالعاندىقتان، ءبىز ىسىرىلىپ قالدىق. ۇكىمەت تاراپىنان نەمقۇرايلىلىق انىق بايقالادى. وسىعان بايلانىستى ءبىز قازىرگى تولەمدەرگە ۇزىلدى-كەسىلدى قارسىمىز جانە مۇگەدەكتىك جاردەماقىسىنىڭ مولشەرىن 100 پايىزعا كوتەرۋدى تالاپ ەتەمىز" دەلىنگەن پەتيسيا ماتىنىندە.

اۆتور سونداي-اق قاراپايىم ازاماتتاردى پەتيسياعا بەي-جاي قاراماي، وعان قول قويىپ، مۇمكىندىگىنشە الەۋمەتتىك جەلىدە ءبولىسۋدى سۇرايدى. 

"ۇكىمەت بىزگە تيىسىنشە كوڭىل بولمەيدى، ەڭ بولماسا قازاقستان ازاماتتارىن بەلسەندىلىك تانىتىپ، رەپوست جاساپ كومەكتەسۋلەرىن سۇرايمىز" دەگەن رانيتا جۇماشيەۆا ماسەلەنى پرەزيدەنتكە جەتكىزگىسى كەلەتىنىن ايتقان. ونىڭ ويىنشا، مۇنداي تۇيىتكىلدى شەشۋ پرەزيدەنتتىڭ عانا قولىنان كەلەدى.

2021 جىلعى مامىرداعى دەرەك بويىنشا قازاقستاندا 702 158 ادامنىڭ مۇگەدەكتىگى بار. ءبىرىنشى توپ مۇدەكتەرىنە مەملەكەت تاراپىنان اي سايىن 65 860 تەڭگە كولەمىندە جاردەماقى تولەنەدى. ەكىنشى توپتاعىلارعا 52 483 تەڭگە، ءۇشىنشى توپتاعىلارعا 35675 تەڭگە تولەنەدى.