قازاقستان تۇڭعىش پرەزيدەنتى نۇرسۇلتان نازاربايەۆ وزىنە بەرىلگەن تاريحي ميسسيانى ورىنداۋدا ايانىپ قالماعانىن ايتادى. بۇل تۋرالى ول "تاۋەلسىزدىك تاعىلىمى" اتتى ماقالاسىندا جازدى.

– ادامزات تاريحىنداعى ەڭ ايتۋلى وقيعالارعا تولى عاسىرلار توعىسىندا ەلىمىزدى باسقارۋ ماعان ۇلكەن سەنىممەن قاتار زور جاۋاپكەرشىلىك جۇكتەدى. مەن ءوزىم باسشىلىق ەتكەن وتىز جىلعا جۋىق ۋاقىت بويىنا تۋعان حالقىمنىڭ سەنىمىن اقتاۋ ءۇشىن بار كۇش-جىگەرىمدى ايانباي جۇمسادىم. ەرلىك پەن ەلدىكتى تۋ ەتكەن، جاسامپازدىقتى جالاۋ ەتكەن حالقىمىزدىڭ دەربەس مەملەكەت قۇرعانىنىڭ وتىز جىلدىق تورقالى تويى قارساڭىندا تاۋەلسىزدىكتەن تاعىلىم الۋ ءۇشىن بۇگىن تۋعان حالقىممەن وي ءبولىسۋدى ءجون كوردىم. تاۋەلسىزدىكتىڭ ءمان-ماعىناسى تۋرالى ءتۇرلى عىلىم وكىلدەرى وزىنشە تۇجىرىم جاسايتىنى انىق. ءبىراق ءبىر نارسە اقيقات، ول – اتا-بابالارىمىزدىڭ ازاتتىق جولىنداعى جان الىسىپ، جان بەرىسكەن سان عاسىرلىق كۇرەسىنىڭ زاڭدى جالعاسى، حالىقارالىق قۇجاتتارمەن بەكىتىلىپ، ماڭگىلىككە بەرىلگەن سىيى. تاۋەلسىزدىككە بارار قيىن جولدارداعى سانسىز كوپ شايقاستار مەن كوتەرىلىستەردە قانشاما قاھارمان بابالارىمىز شەيىت بولدى. ولاردى ەسكە الۋ، قۇرمەتتەۋ – ءبىزدىڭ پارىزىمىز. سوندىقتان ءبىز جاڭا زاماندا قانتوگىسكە جول بەرمەي، قاسيەتتى كيەمىز – تاۋەلسىزدىككە سابىر مەن توزىمدىلىك، اقىل مەن پاراسات ارقىلى قول جەتكىزدىك، – دەيدى ول.

نازاربايەۆ ماقالادا قازاقستاننىڭ ارعى-بەرگى تاريحىنا از-كەم توقتالىپ، تاۋەلسىزدىك جاريالاعان تۇستاعى وقيعالاردى ايتا كەلە قازاقستاننىڭ 30 جىلدا ءجۇرىپ وتكەن جولىنا وزىنشە باعا بەرگەن.